Saturday, December 26, 2015

~~~රොබරෝසියා~~~



ඔන්න ඉඳල ඉඳලා ආවා පොඩි පෝස්ට් එකක් දාන්න. එක දිගට බිසී වෙලා ඉඳල මේ දවස් ටිකේ තමා පොඩි නිවාඩුවක් ලැබුනෙ. ඉතිං මට හිතුනා අළුත් අවුරුද්දකුත් ලබන්න එන නිසා මොකක් හරි තෑග්ගක් දෙන්න ඕනෙ කියල. ඒ තෑග්ග එසේ මෙසේ එකක් නෙමේ. මනා හැදුව සිංදු වලින් හැදුන සාර්ථකම සිංදුව කීවොත් නිවැරදියි. සාර්ථක කම සලකා බැලුවේ තාක්ෂණික අතින් විතරයි. එහෙම නැතුව පදමාලාව අතින් නෙමේ ඔන්න. මොකද මම කරපු සිංදු වල ගොඩක් හොඳ පද රචනා තිබ්බා.

හීන මතකේ තියා 
නීල දෙනෙතේ ලියා 
ඈත ඉගිලී ගියා 
රෝස රොබරෝසියා 

සරසවි දොරටුවේ 
පෙති මටසිළුටු වේ 
ඇයි නෙත නොදුටුවේ 
කඳුළු රොබරෝසියා 

මුදු පෙති මිලින වී 
වැසි මල් තුහින වී 
අද මුනිවත රකී 
සුවඳ රොබරෝසියා 

මේ වචන ටික ලියල තිබ්බේ අපේ නවක (නවක නෑ මට හිතෙන විදිහට) බ්ලොග් රචකයෙක් වන වර්ණකුලකය බ්ලොග් එක ලියන වර්ණ. එයාගෙ කලින් සිංදුවකුත් මම කරපු නිසා මට ඒ වචන ටිකත් මේල් එකට එවල තිබ්බා. නමුත් මම ඒ මේල් එක දකින්නෙ ඊට මාසෙකට විතර පස්සෙ. මේල් එක දැකපු ගමන්ම ඒ වචන ටික මගෙ බොක්කටම වැදුනා කීවොත් නිවැරදියි. ඒ සැනින්ම හිතේ පොඩි මෙලඩි එකක් ඇඳුනා. පස්සෙ ඉතිං මේ ලැබුණ නිවාඩු දවස් ටිකේ ඒ සිංදුව පුළුවන් තරම් හොඳට රෙකෝඩින් කළා. රෙකෝඩින් කළේ ස්ටුඩියෝ එකක එහෙම නෙමේ ඔන්න. සුපුරුදු ජංගම දුරකතනෙයි ඇඩෝබි ඔඩිෂන් කියන මෘදුකාංගයයි තමා මගේ ආම්පන්න ටික. ඊට අමතරව මගෙ ආදරණීය ගිටාරයයි ,ඩොල්කි පාරකුයි, මගෙ සාටර් පීටර් විසිල් කෑල්ලයි, කටහඬයි තමා මේ ගීතය නිර්මාණය කරන්න යොදාගත්තෙ.

මීට කළින් මම මේ විදිහට ගීතයක් කළේ අපේ මාතලන් අයිය ලීව බංගලා හංදියේ කියන ගීතයට. නමුත් ඒ ගීතයේ අඩුපාඩු එමට තිබ්බා. පළවෙනි එක තමා ගීතයේ කොටස් විවිධ වෙලාවල රෙකෝඩ් කරපු නිසා ඇති වෙන වෙනස් කම් හොඳටම අහන කෙනාට දැනෙන එක. නමුත් මේ ගීතයේ ඒ කිව අඩු පාඩු ඔක්කොම හදල උපරිමයෙන් සරල විදිහට ලස්සන මෙලඩි එකක් දාල නිර්මාණය කළා. ඇත්තටම කිවොත් මම ගොඩාක් කැමති ගීතය තමා මේ. අහල බලන්න කොහොමද කියලා.

මෙන්න වීඩියෝ එක 




<< මෙතනින් >> ක්ලික් කරලා ඕඩියෝ එක අහන්න පුළුවන්.

එහෙනම් සියළු දෙනාටම ලබන්නා වූ 2016 නව වසර සියලු පැතුම් ඉටුවෙන වාසනාවන්ත සුභ නව වසරක් වේවා කියල ප්‍රර්ථනා කරනවා. 
ජය වේවා!!!

Sunday, October 18, 2015

වර්ණකුලකයේ ආදරය ගිනි ගනී



ඔන්න හදිස්සියෙන්ම  පෝස්ට් එකක් දාන්න මතක් උනා.ඒ මීට සති කීපයකට කලින් අපේ කුරැටු ගෑ ගී පවුර මගේ පෝස්ට් එකකට කමෙන්ට් එකක් දාලා කරපු ඉල්ලීමක් ඉෂ්ඨ කරන්න. 

ඒ අපේ වර්ණ කුලකය බ්ලොග් එක ලියන  වර්ණකුලසූරිය ලියපු ලස්සන පද පේලියක් ගීතයක් විදිහට නිර්මාණය කරන්න කියලා. 

ඇත්තටම හරිම ලස්සන පද පේලි ටිකක් ඒ පෝස්ට් එකේ තිබ්බෙ. ප්රවීන රචකයෙක්ගෙ ලක්ෂණ ඒ නිර්මාණයේ මම දැක්කා. ඉතින් මට පුළුවන් උපරිමයෙන් එම ගීතයට සාධාරණයක් කරන්න උත්සහ කලේ සම්පූර්ණ සංගීතය සහිතවම නිර්මාණය කරන ගමන්මයි. මොකද මේක මා විසින් නිර්මාණය කරපු ප්රථම විරහ ගීතය නිසා. 

නමුත් මට මේ ගීතයට වීඩියෝ එකක් නිර්මාණය කරන්න බැරිවුණා. 

මෙන්න <<මෙතන ක්ලික් කරල>> ඔන්ලයින් මේ ගීතය අහන්න පුළුවන්.

මේ තියන්නෙ ඒ ලස්සන වචන ටික.

ආදරය ගිනි ගනී
ඇගේ රුව ඇති ඇගේ සුවඳැති
මා තැනූ රෝමයම අළු අතර සඟවා
ආදරය ගිනි ගනී

ඇගේ අත් අකුරු හැඩ
විෂ ඝෝර සර්පයන්
වෙළාගෙන මා සිරුර
පෙළයි මා විෂ දළින්
හෙළා උන් ගින්දරට කෙසේ හෝ මිදෙන්නෙමි
කිසිත් කරගත නොහී වීනාව වයන්නෙමි

ඇගේ සිහිනිඟට සම
පුළිඟු වීදුරු බඳුන්
සොයාවිත් මා මුවඟ
දවයි මා මීවිතින්
හෙළා එය ගින්දරට මීවිතෙන් මිදෙන්නෙමි
කිසිත් කරගත නොහී වීනාව වයන්නෙමි

Thursday, September 17, 2015

මචං කටුස්සා සහ රූපේ...


ඉතිං මචං උඹලට කොහොමද? මේ වෙද්දි උඹල මාත් එක්ක අමනාපෙන්වත්ද කියලත් හිතෙනවා. එහෙම කිව්වම සමහරවිට බලයි මොකද එහෙම කියන්නෙ කියල. ඒ තරමටම උඹලටත් සෑහෙන්න වැඩ රාජකාරි තියෙනවා කියල මම දන්නවා. එහෙම ඉද්දිත් කීප පාරක්ම අපේ උන්ගෙ විවිධ වැඩසටහන් වලට යන්න, තව පොඩි පොඩි පාටි වලට සෙට් වෙන්න අමතක කරේ නෑ. 

මට මතකයි මුලින්ම අපේ බ්ලොග් ලියන රූපෙ කෝල් එකක් දීලා "මචං මේ මනාද? මචං අද ගම්මිරිස් කුරුල්ලා පොත එළිදක්වනවා හවස 3ට. පුළුවන් නම් වරෙන්" කියල කිව්වා. රූපෙ කවදත් තව එකෙක්ගෙ දෙයකට බොක්කෙන්ම සහයෝගෙ දෙන සුන්දර මනුස්සයෙක් කියල රූපෙ දාන කමෙන්ට්ස් වලින් ඕන කෙනෙක්ට හිතා ගන්න පුළුවන්. මගෙ ෆෝන් නොම්මරේ කොහෙන් හොයා ගත්තද දන්නෙත් නෑ. ඒත් එහෙම හොයාගෙන ගත්ත කෝල් එකට මට දෙන්න උන උත්තරේ "අඩේ මචං මට එන්න පුලුවන් වෙයිද කියල ෂුවර් නෑ.  මම ට්‍රයි එකක් දාල බලන්නම්" කියල විතරයි. ඒකට යන්න වෙලාවක් තිබ්බෙත් නෑ. රූපෙ මොනවා හිතුවද දන්නෙත් නෑ. පස්සෙ මම දැක්කා බුකියෙන් කමි, බස්සි එහෙම ඒ පොතේ පිටකවරේ ෆොටෝ දාල තියෙනවා.

ඊට පස්සෙ දවසකත් මොකක් හරි උත්සවේකට යන්න ඔය විදිහෙම කෝල් එකක් රූපෙ දුන්නා. මට ඒකටත් කළින් වගේම උත්තරයක් තමා දෙන්න සිද්ද උනේ. මට කෝල් කිරීමෙන් කිසිම වැඩක් නැති බව තේරුම් ගත් රූපෙ ඊට පසු කිසිම දවසක කිසිම උත්සවයක් ගැන කියන්න කෝල් කළේ නැහැ කියන එකත් මෙතනදී කියන්න ඕනෙ මිත්‍රවරුණි :D. 

ඊළඟට මට මතක් වෙන්නෙ අපේ කසුට්ටා. පොර නම් ඉතිං කතා කළොත් ඔය නොහොඹිනා වැඩකටනේ කතා කරන්නෙ. දවසක් මූ සිකුරාදා හවසක එක පාරට කතා කරල කියපි "මචං අද අපි අටමගේ ගෙදර සෙට් වෙනවා. තව එවුනුත් එනවා වරෙන්" කියල. එකට නම් ඉතාම දුකින් "බැහ්" කියන්න සිද්ද උනේ කළින්ම යන්න දාගත්ත ගමනක් නිසා. ෆෝන් එකෙන් නම් ඒකට කමක් නෑ මචං කියල සාන්ත දාන්තව කතා කරාට, කෝල් එක කට් කරපු ගමන් හොඳ එවුවයින් දෙක තුනක් ඇද බාන්න ඇති  :D. ඊට පස්සෙ කසුට්ටත් කිසිම කෝල් එකක් නම් දුන්නෙ නෑ. සමහර විට ඌටත් රූපෙට හිතුණු දේම හිතෙන්න ඇති. 

කොහොම උනත් කටුස්සා, රූපෙ මචං මට සමා වෙයල්ලා. අපි ළඟදීම දවසක සෙට් වෙමු. 

ප.ලි:

මේ ඩින්ගිත්තත් සෑහෙන්න කාලෙකට පස්සෙ ලියා ගත්තෙ. දැන් ලිපි ලියන්න හරියට වෙලාවත් හොයා ගන්න අමාරුයි. ෆෙස්බුකියේ යනවා වගේ බ්ලොග් වලට ඇවිත් කියවල ගියාට ඒවාට කමෙන්ට් කරන්න වෙලාවක් නෑ. කොහොම හරි සති අන්තෙවත් ඇවිත් පාළුවට ගියපු මේ බ්ලොග් එක ආයෙ ලියන්න පටන් ගන්න ඕනෙ. 

තව ලස්සන සිංදු 3, 4 කුත් එළිදක්වන්න තියෙනවා. අපි ඉතිං සිංදු හදල කීවට කොහෙන්ද වාසනාවක් අර පිළිතුරු ගී කියන නංගිට වගේ ;). ඔක්කොටම කළින් හම්බකරන් ඉන්න එපැයි. 

එහෙනම් සියළු දෙනාටම ජය වේවා!!! 

Monday, August 3, 2015

වාසියටද? අවාසියටද?

ලෝකය ගෝලාකාරයි මිනිස්සු විවිධාකාරයි කිව්වට අපේ රටේ මිනිස්සුන්ගෙ ඔය කියන තරම් වෙනසක් නෑ කියල තමා මට නම් පේන්නේ. ලංකාවේ මූලිකවම ඉන්නෙ වාසියට වැඩ කරන සහ වාසියට වැඩ නොකරන කියන මූලික වර්ග දෙකට අයත් මිනිස්සු විතරයි. මං අපේ මිනිස්සුන්ව පිට රටවල් වල ඉන්න මිනිස්සු එක්ක සංසන්දනය කරන්න යන්නෙ නෑ. ඒ කීවෙ සුද්දො එක්ක. එහෙම කිවේ මොකද මම රට ගිහින් නැති නිසා. 

මම මුලින්ම කීව වර්ග දෙක යටතේ තවත් උප වර්ග කීපෙකට මේ මිනිස්සු වර්ග කරන්න පුළුවන්. 

මුලින්ම ගනිමු වාසියට වැඩ කරන පිරිස. මේ පිරිස යටතේ තවත් උප වර්ග ගණනාවක් තියෙනවා. අපි බොහොම සුළු දේකින් පටන් ගමු. මේ දවස් වල ප්‍රසිද්ධ මාතෘකාවනෙ ඡන්දෙ. දැන් ඔය ඡන්දෙට ඉදිරිපත් වන අපේක්ෂකයන්ගෙන් සීයට අනූ නමයකටත් වඩා පිරිසක් ඉදිරිපත් වෙලා ඉන්නේ වාසිය බලාගෙන. එකඟ නැතුව ඇති බහුතරයක් ;). ඒත් ඒක තමා ඇත්ත. දැන් කවුද ඔතනින් රට ගැන හිතල රටට වැඩ කරන්න ඉදිරිපත් වෙලා ඉන්නෙ. කවුරුත් නැති තරම් නේද? බහුතරයක් වෙච්ච වාසිය බලන් ඡන්දෙට ඉදිරිපත් වුනු අපේක්ෂකයන් බලන් ඉන්නෙ ඇමති කෙනෙක් උනාම "පර්මිට් එක අරං හොඳ වාහනයක් ගන්න, හොඳට සල්ලි හම්බ කරන්න, පවුලට කරන්න, අවුරුදු ගානකට විඳින්න බැරිවුන සැප විඳින්න, බෙදාගන්න බැරි උනු රට බෙදා හදාගන්න, තරහ පිරිමහගන්න " වගේ ඒවනේ. ඔය යටි අරමුණු මුදුන්පත් කරගන්න ඡන්දෙ ඉල්ලනකන් පෙන්නන්නෙ රට දියුණු කරන විවිධාකාරවු ප්‍රතිපත්ති මාලා, පපුවට වදින කතා, හීන පෙන්වන ඇඩ් වගේ ඒවා.  ඡන්දෙ සම්බන්ධ කරගත්තම නම් වාසියට වැඩ නොකරන කියන පිරිසට කවුරුවත්ම හොයා ගන්න නැති තරම්. 

තව උදාහරණයක් ගමුකො. වෙන මොකක්වත් නෙමේ ඡන්දෙ දෙන ජනතාව. මේ අයගෙත් උඩින් කීව වාසිය බලාගෙන සහ නොගෙන කියන වර්ග දෙක ඉන්නව. ඔය එක එක අපේක්‍ෂකයාගේ නමයි මුණයි ගහගත්ත කැප් ටී ෂර්ට් ඇඳන් කට්ටිය කැන්වසින් යන්නෙ, මීටින් වලට යන්නෙ මොකද? ඒ මිනිහා ඇමති කෙනෙක් වෙලා ඇවිල්ලා රට හරි විදිහට හදයි කියල හිතලද. නෑ . තමන්ගෙ මොකක් හරි වැඩකට උදව්වක් ගන්න. "රස්සාවක්, ව්‍යාපාරයක්, නීති විරොධී බලපත්‍ර" ඔය වගේ ඒවා ගන්න තමා බහුතරයක්. ඒ අතර රටට වැඩක් කරයි කියල හිතල ඕවට යන අයත් සිටින්නට පුළුවන්. ඔය කියපු ඒවා අපි කවුරුත් දන්න ප්‍රසිද්ධ රහස්.

ඒ විතරක් නෙමේ. තව ඕන තරම් උදාහරණ තියෙනවා. සමහර මිනිස්සු කෙනෙක්ට උදව් කරන්නෙ ප්‍රති උපකාරයක් බලාගෙන. සමහර ප්‍රේමවන්තයෝ ප්‍රේම කරන්නෙ සල්ලි වලට, සමහරු දෙයක් කරන්නෙ මුදල් බලාගෙන විතරමයි, සමහරු රට ගිහිං සල්ලි හම්බ කරන්නෙ තමන්ගෙ දියුණුවට.

ඇත්තටම රට ගිහිං හම්බ කරන එක වාසියට වැඩ කරන පිරිස කියන එකට දාන්න බෑ. ඒකට හේතු ගොඩක් තියෙන්න පුළුවන්. තමන්ගෙ උගත් කමට සරිලන රැකියාවක් නොමැති වීම, රැකියාවක් තිබුණත් තෘප්තිමත් විය හැකි වැටුපක් නොලැබීම, ඊට අමතරව ලංකාවෙ වැඩක් කරන්න තරම් සුදුසුකම් නැති උනත් පිටරටකට ගිහිං ඉහල වැටුපක් ලබා ගැනීමට හැකි රැකියාවල් තිබීම. ලංකාවේ ජීවන වියදම ඉහළ මට්ටමක තිබීම වැනි කරුණු රට යන්න හේතු වෙන්න පුළුවන්.

එතකොට වාසිය බලාගෙන වැඩ නොකරන මිනිස්සු මේ රටේ නැද්ද? කවුද දන්නෙ ;). එහෙම මිනිස්සු හිටියා, ඉන්නවා සහ ඉදිරියටත් ඉඳීවි. ඒත්  ඒ මිනිස්සුන්ට අපේ සමාජයේ පවතින්න දෙන්නෙ නෑ. ඒ කියන්නෙ ඒ මිනිහට කරන්න පුළුවන් ඔක්කොම  එපා කරපු වැඩ ටික කරලා ඒ මිනිහවත් අනිත් පැත්තට ඇදල ගන්නව. ඒකට මුල් වෙන්නේ අනිත් පැත්තෙ එහෙම නැත්තම් වාසියට වැඩ කරන පැත්තෙ උන්ම තමා. හරියට අර කුපාඩි වැඩ කරන කොල්ලො කෙල්ලො ඉන්න ගමක ඒ මුකුත් නොකර හොඳට ඉන්න එකාව කුපාඩි සෙට් එකට ඇදල ගන්නවා වගේ. ඇදල ගන්න බැරි උනොත් ඒකාට ඒ ගමේ වසන්න දෙන්නෙ නෑ. මේ රටේ වාසියට වැඩ නොකර ප්‍රතිපත්තිගරුකව ජීවත් වෙන්න ඕනෙ නම් ඒ මිනිහට හොඳ ආර්ථික මට්ටමක් තියෙන්න ඕනෙ. ඒ විතරක් මදි, ඒ මිනිහට හොඳ මිනිස්සු පිරිසකුත් ඉන්නම ඕනෙ. ඕක කොයි තැනටත් අදාළයි. ඒ කියන්නෙ අපි රැකියාවක නිරත වෙන කාර්යාලයකට පවා. ඒත් පවතින්න බැරි උණොත් ඒ මනුස්සයත් ස්වයන්ක්‍රීයවම වාසිය බලාගෙන වැඩ කරන්නෙක් බවට පත් වෙනවා. 

හත්තිලව්වයි. ඒ කියන්නෙ අපේ රටේ ඉන්න බහුතරයක් වුනු වාසිය බලාගෙන වැඩ කරන මිනිස්සු, වාසිය බලාගෙන වැඩ නොකර ජීවත් වෙලා ඉඳලා, එහෙම සමාජයේ පවතින්න බැරුව ස්වයන්ක්‍රීයව පරිවර්තනය උනු අයද?   

    

Sunday, August 2, 2015

ශ්‍රී ලංකා පකිස්තාන දෙවෙනි විස්සයි විස්ස තරඟයේ රහස් කතාව.


තරඟයට පෙර පැවති පුහුණු සැසියේදී 

මාලිංග: මචන්ලා අපි මේ පක්කොන්ට නැති වෙන්නම පැරදිලා ඉන්නෙ. උඹල ඒක දන්නවනේ? ඒත් අද අපි   උන්ට පාඩමක් උගන්නන්න ඕනෙ.

මැතිව්ස්: ඒක හරි. මාලි අයිය කීවා වගේ අද අපේ උපරිමයෙන් සෙල්ලම් කරන්න ඕනෙ. 

මාලිංග: අනිවා අපි එහෙම සෙල්ලම් කරනවා. ඒත් ඇන්ජි අද එලියෙ.

කපුගෙදර: හිකිස්. හතර විලි ලැජ්ජාව(රහසින් මිලින්දගේ කනට ලංවෙමින්).

මැතිව්ස්: මේ #කයා මටත් ඇරියා එහෙනං(තමන්ටම කියා ගනියි).

මාලිංග: අද අපි අපේ අළුත් මල්ලිලා එක්ක තමා සෙල්ලම් කරන්නෙ. මායි, දිල්ශාන් අයියයි තිසරයි      කපුගෙදරයි විතරයි ජේෂ්ඨ අය විදිහට ටීම් එකේ ඉන්නෙ. 

අළුත් ක්‍රීඩකයෝ: අද අපිට දෙයියො බැලුවා. ලැබිච්ච අවස්ථාවෙන් බොක්කෙන්ම සෙල්ලං කරල රට       දිනවන්න ඕනෙ.

+++++++++++++++++++++++++

තරඟය ආරම්භ කිරීමට ප්‍රථමයෙන්...

නිවේදකයා: ජාතික වකුගඩු අරමුදල වෙනුවෙන් සන්නාම තානාපතිවරු පත්කිරීමට ශ්‍රී ලංකා ප්‍රජාතාන්ත්‍රික       සමාජවාදී ජනරජයේ ජනාධිපති ගරු මෛත්‍රීපාල සිරිසේන මහතා ක්‍රීඩාංගනයට පැමිණෙන මොහොතයි මේ.

මාලිංග: අම්මට #කෙයි කිව්වලු. ලොක්ක මැච් එක බලන්න ඇවිල්ල. මල්ලිලා අද ලොක්කා අපේ මැච් එකට  ආශිර්වාද කරන්න ඇවිල්ලා. ඉස්සර හිටපු එකා වගේ නැතුව ඇති.  මේ මනුස්සයා සැදැහැ සිතින් ආව ගමනක්. අද අපිට අනිවා මැච් එක දිනන්න පුළුවන්.

අලුත් ක්‍රීඩකයෝ: අද අපිට ආශිර්වාද කරන්න රටේ පළවෙනි පුරවැසියත් ඇවිත්. අද නම් මැරීගෙන සෙල්ලං  කරනවා.

තිරිමාන්න සහ චන්දිමාල්: අදත් කෙල වෙලාම පල. අදත් කෙල වෙලාම පල. අදත් කෙල වෙලාම පල. (ගෙදර ඉඳන්)

නිවේදකයා: දැන් කණ්ඩායම් දෙකේ නායකයන් දෙපල තම කණ්ඩායම හඳුන්වාදෙන මොහොත.

මාලිංග: ගුඩ් ඊවිනින් සෑර්. ඉස්සර නම් ජනාධිපති ග්‍රවුන්ඩ් එක ලඟින් ගියත් අපි පරදිනවා කියල ෂුවර් සෑර්. ඒත් අද අපේ හිත් වල ඒ තිබ්බ බය නැති වෙලා. සෑර් ආවා කියන්නෙ අපි දිනුම්. 

ජනාධිපතිතුමා: මං මාලිංගලා වින්ද පීඩනය ගැන නොදන්නව නෙමේ. මොකද මටත් ඔය විදිහෙම පීඩනයක්   ඔය යකාගෙන් තිබ්බා හිටං. දැන් අපි ඒ අඳුරු යුගය පරාජය කරල ඉවරයි. යහපාලනය යටතේ හැමදේම හරියනව හිටං.

මාලිංග: සෑර් මේ ඉන්නෙ මැතිව්ස්,දිල්ශාන්,තිසර,කුසල්....

ජනාධිපතිතුමා: මම පෞද්ගලිකව සනත්ට කැමති උනත් දැන් වැඩිය මිනිහව දිරවන්නෙ නෑ. ඒත් කුසල් සෙල්ලං කරන හැටි බලන්න ගොඩක් කැමතියි හිටං. දිල්ෂාන් නම් ඒ කාලෙ ලොකු පාටි එකක් එහෙම දුන්නනෙ. ඒකට මගෙ අමනාපයක් නෑ.



+++++++++++++++++++++++++

තරඟය ආරම්භ වී ශ්‍රී ලංකා කණ්ඩායම මුලින්ම පන්දුවට පහර දීමට තීරණය කර ලකුණු 172 ක ඉලක්කයක් ලබා දුන්නා. නවක ක්‍රීඩකයන් ඉතාම ඉහළ දක්ෂතා දක්වමින් මෙම ලකුණු ප්‍රමාණය ලබා ගත්තා.

මාලිංග: අද නම් බඩු හරි වගේ. සාපෙ ඉවරයි. අනිවා දිනනවා.

ජනාධිපතිතුමා: මං බයේ හිටියෙ. අරූට තිබ්බ සාපෙ මගෙනුත් තිබ්බද කියල. මොකද අවුරුදු ගානක් එකට හිටිය ඒකානේ හිටං.

තිරිමාන්න, චන්දිමාල්: අඩේ මුන් ටික අපේ ප්ලේස් වලටත් කෙලියා නේද? අනේ පැරදියන්. අනේ පැරදියන්.   අනේ පැරදියන්.

++++++++++++++++++++++++++

පකිස්තානු කණ්ඩායම පිළිතුරු ඉණිම ආරම්භ කල අතර, පන්දුවාර දහයක් අවසානයේ කඩුලු පහක් දැවී ලකුණු හතලිස් ගණනක් ලබා ගනිමින් ඉතාමත්ම අසීරු තත්වයක සිටියහ. මේ සඳහාද වැඩි හරියක්ම මුල් උනේ නවක ක්‍රීඩකයන්ගේ දක්ෂතාය. 

මාලිංග: අද නම් අපි ගොඩ. අම්මේ ඇති. දැන් ඉතිං මන් බෝල් කරලා ඉතුරු විකට් ටික සුටුස් ගාල කඩල         දාන්න ඕනෙ.

තිරිමාන්න, චන්දිමාල්: අනේ පැරදියන්. අනේ පැරදියන්. අනේ පැරදියන්.

මාලිංග ගේ පන්දුවාරයකට පකිස්තානු නායක අෆ්රිඩී හයේ පහර දෙකක් එල්ල කරන ලදී.

මාලිංග: මේකා කිසි ගේමක් නැතුව කෙලියනේ. අපි පරදියි වත්ද?

චමින්ද වාස්: හොඳ වැඩේ ඕකට. ෆිට්නස් නැතිව විකට් ගන්න බෑ කියල කී පාරක් මං කෝච් කරද්දි කිව්වද.     ඇහුවෙ නෑනෙ. #කයා. 

ජනාධිපතිතුමා: (දුරකතනයෙන්) රාජිත අපි පරදියිද හිටං?

රාජිත: පිස්සු කතා කරන්න එපා. අපි මේ උගුරේ ලේ රහ වෙනකං ඉස්ටෙජ්වල කෑ ගහන්නෙ පරදින්න නෙමේ සර්. එහෙම උනොත් පාරෙ බැහැල යන්නෙ කොහෙමෙයි. අපි දිනනවා. ඒ ගැන බය වෙන්න එපා.

+++++++++++++++++++++++++++++++++

අවසාන පන්දුවාරය තෙක් තරඟය ඇදගෙන ආවත් ප්‍රතිවාදීන් ඉතාමත්ම ප්‍රභල ලෙස ලකුණු හඹා ගිය අතර ජේෂ්ඨ ක්‍රීඩකයන්ගේ පන්දුවාර වලට එක පිට එක ප්‍රහාර එල්ල කරමින් තරඟයේ පීඩනය ශ්‍රී ලංකා පිළට යොමු කළේය. ජයග්‍රාහි ලකුණු වාර්තා කළේ හයේ පහරකිනි.

+++++++++++++++++++++++++++++++++

තිරිමාන්න, චන්දිමාල් : හුරේ.................

මැතිව්ස්: ලොල් 

වාස්: සාදු 

මාලිංග: දැන් ඉතිං දීපන්කො අර මාධ්‍යවේදියෝ අහන ඒවට උත්තර. 

ජනාධිපතිතුමා: මලහත්තිලව්වයි. ජනතාවගෙ විශ්වාසය මට නැති උනාද මංදා හිටං.

+++++++++++++++++++++++

ටික වේලාවකින් ජනාධිපතිතුමාගෙ ජංගම දුරකතනයට පික්චර් මැසේජ් එකක් ලැබුණි. පහත දැක්වෙන්නේ එම පික්චර් එකය.



ඒවා තිබුනේ හිටපු ජනපති, වෙන්න අගමැති මරා. 

+++++++++++++++++++++ නිමි +++++++++++++++++++++

සැළකිය යුතුයි:

මෙම සිදුවීම සම්පුර්ණයෙන්ම මනසින් මැවූ සිදුවීමක් පමණි. කිසිඳු කෙනෙක්ට අපහාස කිරීමට, මඩ ගැසීමට, මඩ සේදීමට, කඩේ යාමට හෝ දේශපාලනයට සම්බන්ධව අදහසක් පළ කිරීමේ ඡේතනාවෙන් මේ සිදුවීම නිර්මාණය නොකළ බව මෙයින් සහතික කර ප්‍රකාශ කර සිටිමි.

ජාතික වකුගඩු අරමුදලේ සන්නාම තානාපතිවරු වශයෙන් මුත්තයියා මුරලිදරන් සහ තිලකරත්න දිල්ෂාන් යන මහත්වරු ගරු ජනාධිපති මෛත්‍රීපාල සිරිසේන මහතා විසින් නිළ වශයෙන් පත් කරන ලදි. 

ස්තූතියි.






Saturday, July 11, 2015

පාරුවට පවා සැනසුම දැනේ!




තෙරක් නොපෙනෙන විසල් වැව් මත පාරු පැද යමි          සීරුවේ
ඇතත් සිත තුළ හැඟුම් රොද බැඳ උහුල ගෙන ඉමි            පාළුවේ
නුඹත් සිහිවිය තනිව සිටි කල නිසල වැව මත                  පාරුවේ
ඉමක් දුටු විට සතුට ගෙන දේ  වෙහෙස හෙමිහිට            මාරුවේ



canvas by Karen Tarlton
වැරදි හැදුවෙ නිහඬ සිත්තරාවි

Monday, June 29, 2015

මගහැරුණද? නැත්තම් මගහැරියද?


ටික දවසකට මගෙ බ්ලොග් එක පැත්තෙ එන්න බැරිවුන නිසා බ්ලොග් එක පාළුවට ගිහින් කියල හිතෙනවා. ඒ වගේම කාගෙවත් බ්ලොගකට ගොඩ වෙන්නත් බැරි උනා. ඒ ගතිය නැති කරල දාන්නත් එක්ක මේ පෝස්ට් එක ලියලා දාන්න හිතුනා. කියන්න හදන්නෙ බ්ලොග් එකක් ගැන පොඩි ඔත්තුවක්. ඇත්තටම ඔත්තුවක් දෙන්න දේකුත් නෑ. ඒ බ්ලොග් එක පටන් අරන් දැන් අවුරුදු ගාණක් වෙනවා. නමුත් මට හිතෙනව ඒ බ්ලොග් එක අපේ ගොඩ දෙනෙක්ට මගහැරිලා කියල. එක්කො මගහරිනවා වෙන්නත් පුළුවන්. වැල් වටාරම් නැතුව කෙලින්ම කියන්නම්කො. මේ කියන්න හදන්නෙ   << කඳු >> බ්ලොග් එක ගැන. ගොඩ දෙනෙක් මේ බ්ලොග් එක ගැන දන්නවා කියල මට හිතෙනවා. ඒ වගේම සමහරු අනං මනං කියයි කියලත් හිතෙනවා. "අපෝ ඒකෙ කමෙන්ට් එකක් දැම්මට රිප්ලයි එකක් වත් දාන්නෙ නෑ", "එයාගෙ ලොකු කමට වෙන්න ඇති කමෙන්ට් කරන්නෙ නැත්තෙ, අපි යයි එයාගෙ බ්ලොග බලන්න" ඔය වගේ නොයෙකුත් ජාති කියනවා ඇති කියල මට හිතෙනවා :D. ඇත්තටම කමෙන්ට් එකක් දැම්මට රිප්ලයි කරන්නෙ නම් නැහැ තමා ලේසියකට. මට හිතෙන්නෙ බ්ලොග් එක කරන අයිතිකාරියට තියෙන කාර්යබහුලත්වය වෙන්න ඇති ඒකට හේතුව. 

ඒ මොනවා උනත් කඳු බ්ලොග් එකට ගිය ඕන කෙනෙක් දන්නව කොයිතරම් හැකියාවක් තියෙන කෙනෙක්ද ඒක ලියන්නෙ කියල. සිංහල භාෂාව හසුරවන අපූරුව ඒ බ්ලොග් එකෙන් ඕන කෙනෙක්ට ඉගෙන ගන්න පුළුවන්. ලස්සන කවි වර්ග, කතා ආදිය හිත ඇදිල යන විදිහට ලියල තියෙන හැටි දැක්කම කමෙන්ට් වලට රිප්ලයි නොකළත් හොරෙන් හරි ගිහින් බලන්න හිතෙන එක හැම කෙනෙක්ටම සාමාන්‍ය දෙයක් වෙන්න ඇති කියල මට හිතෙනවා. ඒ වගේම හැම පෝස්ට් එකකටම යොදාගන්නා ඡායාරූපයේ අයිති කරුවාගේ නම හෝ අඩුම ගානෙ අරගත්ත තැන හරි ලින්ක් එකත් එක්ක දාන එකත් සුවිශේෂයි. අපි නම් ගොඩ දෙනෙක් ඒක කරන්නෙම නෑ (මාත් ඇතුළුව) :D. අපි කරන්නෙ ඕන ඡායාරූපයක් අපේ වගේ දාන ඒකනෙ.  මේ බ්ලොග් එක ලියන්නේ සශිකා අමාලි මුණසිංහ කියන අක්කා. මම කියන්නෙ කඳු අක්ක කියල. කඳු බ්ලොග් එක ලියනවට අමතරව වෙනත් මාධ්‍ය වලට ලිපි එහෙමත් ලියනවා මම දැකලා තියෙනවා. සිංහල භාෂාව හැසිරවීම ගැන නම් කියන්න දෙයක් නැහැ. 

ඉතිං මේ කඳු අක්ක ගැන කීවේ වෙන මොකකටවත් නෙමේ. කොයි තරම් වැඩ රාජකාරි මැද්දෙ හිටියත් මට සුපුරුදු සංගීත උණ අඩු වෙන්නෙ නෑනෙ. මම ඉතිං කඳු බ්ලොග් එක බලනවා සාමාන්‍යයෙන්. එහෙම බලද්දී ලස්සන කවි පේලි ටිකක් පළ කරලා තිබ්බා එක පොස්ට් එකක "ප්‍රේමයයි සොඳුර ඔබ ගැන" කියන මාතෘකාව දාලා.
<<මෙතනින් ඒ පොස්ට් එකත් බලන්න පුළුවන්>>

ඒක දැක්ක හැටියෙ මට ඕනවුනේ කොහොම හරි ඒකට මම දන්න සංගීතෙ පාවිච්චි කරලා සිංදුවක් විදිහට නිර්මාණය කරන්න. කඳු අක්කගෙත් කැමැත්ත ඇතුව මම ඒක නිර්මාණය කළා. ගීතය නිර්මාණය කරද්දී කඳු අක්කා විසින්ම මුල් නිර්මාණයේ තිබ්බ පද පේළි දෙකක් වෙනස් කළා. මේ තියෙන්නේ ඒ පද ටික.

සඳ සරස නොමැති බව දැන 
සඳ නෙළා ගෙනත් අහසට 
මල් සුවඳ කැමති බව දැන 
තුරු සියක් මවා හිනැහෙන 
මා කුරුළු පියාපත් සිඹ 
දොර කවුළු පියන් හැර ගෙන 
කඳු ඉසහි රැඳෙන දේදුණු 
පැහැ කරයි සතුට ගැන ගැන 

ගඟ ඉවුරු අසළ හිඳ වෙණ 
වයයි මිහිරි තුඩගින
රළ අතර විහිද උපදින 
පැතුම් ඉපිද  මිය යන 

කඩවසම් ඉවුරු ගඟ ළඟ 
නවතින්න බැරිද අසමින 
දෑසමන් මලකි හිනැහෙන 
ප්‍රේමයයි සොඳුර ඔබ ගැන 

ඉතින් මේ පද පේළි ටිකට මගෙ හිතට ආව මෙලඩි එක දාල ගීතය නිර්මාණය කරලා මගේ යූටියුබ් චැනල් එකට අප්ලෝඩ් කළා. ඇත්තටම මේ ගීතය ගායනා කරන්න ඕනෙ ගායිකාවක්. මම ගායිකාවක් කොහෙන් සෙට් කරගන්නද මේවා කියන්න. දැනට ඉතින් මම ම ගායිකාවගෙ පාට් එකත් කලා. පස්සෙ හොඳ කෙනෙක් හම්බුනොත් කියන්න දෙනවා.

මම මේ ගීතය පළවෙනි පාරට මල්ටි ට්‍රැක් විදිහට හැදුවා. ඒ කියන්නෙ ෆෝන් එකෙන් සිංදුවේ කෑලි කෑලි රෙකෝඩින් කරලා පස්සෙ ඒ ටික එකතු කළා(ඔහොම තමා ඔයාලා හරි ලස්සනයි කිය කියා අහන ඔක්කොම සිංදු හදන්නෙත් ශබ්දාගාර වල. එකම වචන ටික හරියටම කියවෙනකන් පස් හය පාරක් කියනවා. මමත්  බොහොම ප්‍රාථමික මට්ටමින් ඒ වැඩේ කරා). කෑලි එකතු  කළේ ඇඩෝබි ඔඩිෂන් කියන මෘදුකාංගය පාවිච්චි කරලා. මේවා  ඔක්කොම පර්යේෂණාත්මක මට්ටමේ නිර්මාණයන්. ඒ එක්කම පුළුවන් විදිහට තාක්ෂණයත් මුහු කරන්න උත්සාහ කරනවා. අඩු පාඩු තියෙනවනම් පෙන්වා දෙන්න කියලත් ඉල්ලා සිටිනවා. පහළින් යූටියුබ් වීඩියෝව සහ වීඩියෝ එක  බලන්න බැරි අයට ඕඩියෝ එක දාල තියෙනවා අහන්න. අහල බලන්නකො මොකද තත්වෙ කියලා :D. අහන ගමන්ම පිං අතේ වැඩකුත් කරගන්න හැමෝටම අවස්තාවක් තියෙනවා. මගෙ බ්ලොග් එකේ ගැජට් එකක් එල්ලලා තියෙනවා දකුණු අත පැත්තෙ උඩම. ඒකෙ තියෙන්නෙ යූටියුබ් කියල රතුපාට බට්න් එකක්. ඒක ක්ලික් කරලා මගෙ යූටියුබ් චැනල් එක සබ්ස්ක්‍රයිබ් කරලා මහා පිං කමකට දායක වෙන්න හැම කෙනාටම පුළුවන් ;). 

<<මෙතනින් ක්ලික් කරලා ඕඩියෝ එක අහන්න>> 


මෙන්න යූටියුබ් වීඩියෝ එක බලන්න.



එහෙනං ගිහිං එන්නම්.
ජය වේවා!!!

Tuesday, June 16, 2015

නිදහස?

නිදහස is that freedom

කොළඹින් වැලිමඩ බලා රාත්‍රී 10 ට පිටත් වන අර්ධ සුඛෝපබෝගී බස් රථයේ ක්‍රියාත්මක වෙමින් තිබූ රේඩියෝවේ හඬ බසය තුළ හීන් හඬින් ඇසෙයි.  නිමල් බස් රථයේ පිටුපස ආසනයේ වම් කොනකට වී තරමක කල්පනාවක ගිලී සිටියේය.බස් රථයේ ආසන සියල්ලකම වාගේ එකා දෙන්නා ඉඳගෙන සිටියි. අයෙකු කෙටි නින්දකට වැටී සිටියි. තවකෙකු ජංගම දුරකථනය කනේ ගසාගෙන මල් යායක තනිවී ඇත. තව කීප දෙනෙකු කෙටි ආහාරයක් ගනිමින් පසු වෙයි. මේ සියල්ල මැද්දේ නිමල් තමන්ගේ බර කල්පනාවෙන් එපිට මෙපිට පනිමින් බසය ගමන් ආරම්භ කරනතුරු වෙලාව බලමින් සිටියි. බසය තුළ සියුම් කසුකුසු කිහිපයකි. කතාබහ සියල්ල අපැහැදිළි නමුත් සිංහල සහ දමිළ ලෙස භාෂාවේ වෙනස පැහැදිලිව හඳුනා ගැනීමට ඔහුට හැකි විය. වැලිමඩ බලා පිටත්වන බසයක් බැවින් වතු ආශ්‍රිතව වාසය කරන දමිළ මිනිසුන් සහ ගැහැණුන් කිහිපදෙනෙක්ම බසයේ සිටින බව නිමල්ට පෙනුණි.

මේ කාලය අතරතුර බසයට ගොඩවූ වෙළෙන්දන් කිහිප දෙනෙකු විවිධාකාර දේවල් අලෙවි කිරීමේ කටයුතු වල යෙදී සිටියහ. බසය පිටත් වීමට තවත් විනාඩි දහයක් පමණ ඇත. බසයට ගොඩවූයේ තරුණ යුවළකි. දෙදෙනාටම එකට ඉඳගෙන යෑමට අසුනක් පිරික්සමින් බසයේ ඉදිරිපස සිට පිටුපස බලා වෙළෙන්දන් අතරින් තමා දෙසට එන තරුණ යුවල දෙස නිමල් තරමක උනන්දුවෙන් බලා සිටියේය. ඔවුන් දෙදෙනා පෙනුමෙන් වතු දමිළ බව නිමල්ට අවබෝධ විය. සෑම අසුනකම එක පුද්ගලයෙකු හෝ වාඩිවී සිටි බැවින් ඔවුන් දෙදෙනාට එකට ඉඳගැනීමට ආසනයක් සොයා ගැනීමට නොහැකි වී ඇති බව ඔවුන්ගේ මුහුණුවල ස්වභාවයෙන්ම නිමල්ට අවබෝධ විය. සෙමෙන් තමා අසුන් ගෙන සිටි අවසාන ආසනය වෙත පැමිණි යුවළ මදක් ආසනයේ දෙකොන පිරික්සන්නට විය. ආසනයේ එක් පැත්තකට වන්නට තරුණයන් තිදෙනෙක් අසුන්ගෙන සිටියි. අනෙක් පසින් ඉඳගෙන සිටින්නේ නිමල්ය. නිමල් මේ වන විට බසයෙන් ඉවත බලාගෙන සිටියි. තරුණ යුවළගේ බලාපොරොත්තු කඩවුණු ස්වභාවයකි. දමිළ තරුණිය තම පෙම්වතාට නිමල් දෙස බලමින් මොනවදෝ රහසින් මෙන් කොඳුරන හැටි නිමල්ට ඡායාවක් ලෙස පෙනෙයි.

"එයාට මෙහෙට වෙලා අපිට අයිනෙ ඉඳගන්න සීට් එක ඉල්ලගන්නකෝ" වැනි දෙයක් පවසන බව දමිළ බසින් තම පෙම්වතාට තොන්දොල් වෙමින් කතා කරන ආකාරයෙන් නිමල්ට දැනෙන්නට විය. නිමල් බසයේ ජනෙල් කවුළුවෙන් එපිට බලාගෙනම හිඳියි. තම පෙම්වතියගේ ඉල්ලීමට සවන් දුන්නත් එය ඉටුකිරීමට තරුණයා මැලි වන බවක් නිමල්ට වැටහිණි. තමන් සිංහල තරුණයෙකු වූ නිසා, සිංහලයන් යනු තමන්ගේ සතුරන් ලෙස සමහරවිට ඔහු තවමත් විශ්වාස කරනවාද, නැතිනම් සිංහලයන්ට ඇති බියමුසු හැඟීමක් නිසා එසේ කරනවාද යන්න නිමල්ගේ හිතේ දෙගිඩියාවකි. නිමල් හට කිසිවක් නොපැවසූ මේ පෙම්වතා අවසානයේදී තම පෙම්වතියට යමක් දමිළ බසින් පැවසීය.

"එයා සීට් එක දෙන එකක් නෑ. පේන්නැද්ද හිනාවක් නැතුව රවාගෙන අහක බලන් ඉන්න හැටි. වෙන කරන්න දෙයක් නෑ, අපි මේ සීට් එකේම මැදින් ඉඳන් යමු." වැනි දෙයක් පවසන්නට ඇතැයි එම කතා විලාසය අනුව නිමල්ට වැටහිණි. තම පෙම්වතාගේ ඇඟට බර වී ආදර වදන් තෙපුලමින් බසයේ ගමන් කිරීමේ අහිංසක බලාපොරොත්තුව පන්හිඳකින් ලියූ මුතු අකුරු පෙළකට දිය බිඳක් ඉසුනාක් මෙන් බොඳ වී යන්නට ඇතැයි නිමල්ගේ සිතට දැනෙන්නට විය. එයින් තම සිත තරමක් උණුවුවත් ඒ බවක් මුහුණේ එකඳු ඉරියව්වකින් වත් නොපෙන්වීමට නිමල් වග බලා ගත්තේය. තරුණිය තමන්ගේ ළඟිනුත්, තරුණයා අනිත් තරුණයන් තිදෙනාගේ පසිනුත් අසුන් ගත්තත්, තරුණිය ඇයගේ එක නූල් පටක්වත් තමන්ගේ ඇඟේ නොගෑවෙන සේ අසුන් ගෙන සිටින බව නිමල්ට දැනුණු නිසා නිමල් තරුණියගේ මුහුණ දෙස හැඟීමකින් තොරව බැල්මක් හෙළීය. ඇය නිමලුත් ඇයත් අතර මද හිඩැසක් තබා ගෙන තම පෙම්වතාට තුරුල් වී සිටියේ තමාව ගිලගැනීමට පැමිණි රාක්ෂයෙකුගෙන් බේරීමට මෙනි. නිමල්ගේ හිතට නැවතත් ඒ කුමක් නිසාද යන දෙගිඩියාව පැන නැගෙන්නට විය.

නියමිත වෙලාවට බසය පිටත් වුනි. තවමත් තරුණ යුවළ ඉඳගත් ආකාරයටම එකිනෙකාට වඩාත් සමීපව සිටියි. තමා හා තරුණිය අතර ඇති පරතරය එලෙසම තබා ගැනීමට නිමල් වග බලා ගත්තේය. බසය වේගයෙන් ඉදිරියට යයි. ඉඳ හිට හිටිවනම බ්‍රේක් පාරවල් ගසන විට බසයේ සිටින උන් තමාගේ ඉදිරි අසුන් සිප ගන්නට විය. අවසන් ආසනයේ මැදට වන්නට සිටි තරුණ යුවලට සිප ගැනීමට ඔවුන් ඉදිරියේ අසුනක් නොමැත. ඉදිරියට ව්සිවී බිම සිප ගැනීමට නම් කිසිම බාධාවක් නැත. සිප ගන්නට උවමනාම නම් සිටින්නේ තම ආදරණිය පෙම්වතා සහ පෙම්වතිය පමණි. මේ බව අවබෝධ කරගත් පෙම්වතා තමාගේ දකුණු පසින් ඇති ආසනයේ ඇති යකඩ බටය තදින් අල්ලාගෙන අනිත් අතින් තම පෙම්වතිය තදින් අල්ලා ගත්තේය. නිමල් තමාගේ ජංගම දුරකතනයෙන් ගීතයක් අසමින් කවුළුවට එපිටින් වේගයෙන් පසු කරන අන්දකාර දර්ශන දෙස බලාගෙන සිටියි.    

කාලය කෙමෙන් ගත වෙද්දී බසයේ රියදුරු එක වරම ගැසූ බ්‍රේක් පහර නිසා නිමල්ගේ දකුණු උරහිසට එකවරම බර ගතියක් දැනෙන්නට විය. නින්දේ සිටි පෙම්වතාගෙ අතින් ගිලිහුණු තරුණිය නිමල්ගේ උරයේ බරවී සිටී. නිමලුත් තරුණියත් අතර ආසනයේ තිබූ හිස් අවකාශය සොයා ගැනීමටවත් නොමැත. ඇය බර නින්දකට වැටී ඇති නිසා අවදි නොවන්නට හේතුව වන්නට ඇතැයි නිමල්ට සිතුනේ ඇය තමාගේ උරයට බර වී සිටි අසමමිතික ස්වභාවය නිසාය. පෙම්වතාද බර නින්දක පසුවෙයි. තරුණිය නින්දෙන් අවදිකර තමාගේ ඇඟෙන් ඉවත් වන ලෙස පැවසීමට අවශ්‍ය උවත් එසේ කිරීමට හිත නොදුන්නේ කිමදැයි නිමල්ට තේරුම් ගැනීමට නොහැකි විය. එසේ ටික වෙලාවක් සිටින විට තරුණියගේ උකුල මත තිබූ බෑගය ලිස්සා බිමට පතිත විය. නමුත් තරුණිය අවදි නොවිණි. නිමල් සෙමෙන් තමන්ගේ වම් අතින් ඇයගේ ඇඟට තට්ටුවක් දමා ඇයව නින්දෙන් අවදි කරනු ලැබීය. අවදි වුනු සැණින් නිමල්ගේ ඇඟෙන් මිදුණු ඈ "Sorry" යනුවෙන් දමිළ ඌරුවට පැවසුවේ ලැජ්ජාවෙන් හිනාවකින් මුහුණ සරසා ගන්නා අතරතුරදීය. බිම වැටුණු බෑගය නිමල් විසින් ඇයට රැගෙන දුන් අතර "Thank you" කියමින් එය ගන්නා විට ඇයගේ පෙම්වතාද නින්දෙන් අවදි වි සිටියේය. 

මේ වන විට බසය නිමල්ගේ බස් නැවතුම් පොළට තරමක් ආසන්න වෙමින් ඉදිරියට ඇදෙන්නට විය. රාත්‍රියට අර්ධ සුඛෝපබෝගී දුරගමන් සේවා යන බස් රථ සාමාන්‍ය බස් රථ වලට වඩා වැඩි වේගයකින් ධාවනය වන නිසා අඩු කාලයකින් අවශ්‍ය නගර කරා ළඟා වීමේ හැකියාවක් ඇත. දැන් වෙලාව රාත්‍රී 12 ට ආසන්න වෙමින් පවතී. බස් රථයේ ගමන් ගන්නා මගීන් කිහිප දෙනෙක් හැර අනෙක් සියළු දෙනාම තද නින්දේ පසු වූහ. රියදුරු විසින් බස්රථයේ ඇතුළත විදුළි පහන් නිවා දමා රාත්‍රී කාලයේ දල්වන මද එළියක් සහිත විදුලි පහන් දෙකක් පමණක් දැල්වූ හෙයින් රථය තුළ අඳුරු ස්වභාවයක් පැවතුනි. තරුණ යුවළත් නිමලුත් අවදියෙනි. නිමල් නැවතත් ගීත වලට සවන් දෙමින් කවුළුවෙන් පිටතට දෑස් යොමා සිටියි. තරුණ යුවළ මද අඳුරේ පෙම් සුව විඳීමට සැරසුනත් තමන් අසල සිටින සිංහල තරුණයා බලාවිදෝ යැයි සැකයෙන් එකිනෙකාගේ මුහුණ බලමින් පසු වන බව නිමල්හට තේරුම් ගිය අතර යුවළ ඒ සමග තමන් දිහාද කිහිප විටක් බලමින් පසුවන බව ඔහුට වැටහිණි. 

සමාජයේ පෙම්වතුන්ට නිදහසේ පෙම්සුව විඳීමට අවසරයක් නැත්තේ තමන් ජීවත් වන සමාජයේ මිනිසුන් ඒ දෙස බලන්නේ පුදුමයකින් සහ වැරදි ඇසකින් නිසා යැයි නිමල් කල්පනා කළ අතර එහිම එක අවස්ථාවකට තමන්ට එහා පැත්තේ සිටින දමිළ යුවලටද මුහුණදීමට සිදු වී ඇති බව ඔහු තේරුම් ගත්තේය. දමිළ සමාජයේ සහ සිංහල සමාජයේ පෙම්සුව විඳින පෙම්වතුන් දෙස බලන්නේ එකම කෝණයකින් යැයි වරෙක ඔහුට සිතුණත් දමිළ සමාජයේ ඒ සඳහා ඇති නිදහස ඊට වඩා ඇහිරී ඇති බව ඔහුට තේරුම් ගියේ ඔවුන්ගේ ආගමික විශ්වාස සහ උග්‍ර කුල භේදය නිසා බැවිනි. තවත් මෙම තරුණ යුවළට බාධාවක් නොවී මේ කෙටි කාලයට හෝ නිදහසේ ඔවුන්ගේ පෙම්සුව බුක්ති විඳීමට ඉඩදිය යුතු යැයි තීරණය කළ නිමල්, තමා අසුන්ගෙන සිටි තැනින් නැගිට බස් රථයේ ඉදිරිපස දොර වෙත පිය නගන්නට විය. ඒ සමගම තරුණ යුවළ නිමල් අසුන් ගෙන සිටි පිටු පස ආසනයේ වම් කොනට ඇදෙන්නට විය.

~~~ නිමී ~~~

Monday, June 8, 2015

පියෙකුගේ ආදරය...



ඉපදුණු දා සිටම නුඹ මේ                        ලෝකයට 
ඇතිවුනෙ සතුටක්ම පමණකි පුතුනේ            මෙමට 
මවු තුමියටත් ඉහළින් නුඹ මා                         හදට 
ලංවුනෙ ඒ නිසයි ආදර පුතුනී                           මට 

කැත කුණු අත ගගා මා නොහැදුවත්                  නුඹ 
නව ජීවයකින්ය රැකියා කළේ                           මම  
වෙනදා මෙන් නොවේ එය හරි මිහිරි                  විය 
ඉන් ලැබෙනා සියළු දෑ මගෙ රන්                 පුතාටය  

ටික ටික නැගිට ඇවිදින කාලයත්                      නුඹ 
මතකය අද වගේ තවමත් පුතුනි                         මට 
සිහිවෙන විටදි ඒ කිරිකැටි සිනහ                        මුව 
ඇසෙනව හැම තැනම නුඹෙ ඒ සිනා                   හඬ
  
පාසැල් යන මුල් දිනයෙ දැක නුඹෙ දුක්            මුහුණ
ඇඬුනා මටත් රහසින් නොපෙනෙනා                ලෙස 
කෙරුමට අකුරු සමතෙක් බව කිවූ                   විගස 
ආඩම්බරෙන් බැලුවා නුඹ දිහා                           මම 

ගතවී කාලයත් හෙමිහිට                          හොරාටම 
හැකි විය පුතුට දිනුමට කඩයිම්                        එමට
සෙවනැල්ලක් වෙමින් ඒ හැම                 වෙලාවෙම 
සිටියෙමි පුතුනි නුඹගේ පසු පසින්                     මම 

නිමකර නුඹ මේ රටෙහි කල ඒ                   උපාධිය
සිදුවිය ඉඩ දෙන්න හැර යන්නට                  සැවොම
ලැබු පසු උසස් දැනුමක් ඒ රටේ                        සිට 
එන බව දනිමි පුතුනේ මා                            දිහාවට

සිදුවුනෙ කිසි ලෙසක නොහිතූ දෙයකි                මට 
පුතු ගිය පසු දැන ගතිමි මා රෝගියෙකු               බව 
දැනුණත් අඩුව නොමැතිව නුඹ මා                   අසල    
වැලපුනි මා සිතින් හොර රහසෙන්                 සැමට        

වැඩි කාලයක් නැති බව හොඳ හැටි                දැනුණි 
නොයෙනා ගමන් යන්නට සිදුවන                  හැඩකී
විභාග ගොඩකි මේ දිනවල පුතුට                      සකි       
දන්වනු එපා දුක්වෙයි පුතු අතැර                        දිරි 

ඇතිමුත් රුචිය දැකුමට සුදු පුතා                     මගේ 
පැවසිය නොහැක ඒ බව පුතු                 වැටේවිනේ 
මා මළ පසුව නොහඬනු නොබනිනු             පුතුනේ 
මා හට කමා කර දුක් නොමවනු               සොඳිනේ         



වැඩි දුර අධ්‍යාපනය ලැබීම සඳහා එතෙර ගොස් සිටි තම පුතාට තිබෙන ආදරය නිසා, ඔහුගේ අධ්‍යාපන කටයුතු වලට මෙන්ම වර්ෂ අවසාන විභාග වලට බාධාවක් වෙතැයි සිතා තමාගෙ මාරාන්තික රෝගී තත්වය හා මරණය ඔහුට දැනුම් නොදෙන ලෙස පවුලේ සැමගෙන් ඉල්ලු ආදරණීය පියෙකුගේ හිතෙහි ඇති වන හැඟීම් සමුදාය ගැන මට දැනුණු විදිහ කවි පංතියකින් ඉදිරිපත් කිරීමට උත්සාහ කළා. මේ සිද්දිය දැනගත් පසු මාගේ ආදරණිය මිත්‍රයා ඔහුගේ සියළු වැඩ පසෙක තබා දිවයිනට පැමිණියත් ඒ වන විටත් ඔහුගේ ආදරණීය පියා ඔවුන් සියළුදෙනාම හැර ගොස් තිබුණා. තම පියා සමග අවසන් වරට වචනයක් කතා කිරීමට නොහැකි වූ ශෝකයෙන් ඔහු තවමත් පසු වනවා. ඒ ආදරණීය පියතුමාට නිවන්සුව අත්වේවායි මා ප්‍රර්ථනා කරමි.     

Thursday, June 4, 2015

එන්න ෂර් ඇතුළට! මොනවද බෙලුවේ?


"එන්න ෂර් ඇතුළට! මොනවද බෙලුවේ?" 
"මට හොඳ බැක්පැක් එකක් ගන්න ඕනෙ. ඔයාල ළඟ තියෙනවද?"
"තියෙනවා ෂර්. ෂර්ට මොනවගේ එකක්ද ඕනෙ. ට්‍රැවල් කරන්නද? නැත්තං ඔෆිස් යන්නද?"
"මට ට්‍රැවල් කරන්නයි ඔෆිස් යන්නයි සේරටම හොඳ එකක් ඕනෙ. තව ලැප් එක අවුලක් නැතුව ගෙනියන්නත් පුළුවන් වෙන්න ඕනෙ"
"ඇවිත් බලන්නකො ෂර් මේ තියෙන්නෙ ෂර් කීව විදිහෙ එකක්. තව මේ සෙට් එකත් ඒ විදිහෙ ඒවා. තෝරලා බලන්නකො "
"ම්ම් මේක ටිකක් හරි නෑ වගේ නේද? පෙනුමත් හරි නෑ. හයියත් මදි වගේ. වෙන හොඳ ඒවා නැද්ද"
"තියෙනවා ෂර් මේ තියෙන්නෙ අපි ළඟ තියෙන ඔඳම බ්‍රෑන්ඩ් එකක්. "ස්විස්ගියර්". හැබැයි ෂර් මේක ටිකක් ගණන්. අඩු කරල දෙන්නම්."
"කෝ බලන්න." 
"ෂර් මේක හොඳ කොලිටි බෑග් එක.මේ බලන්නකො ෂර් ලැප් එක දාන්න තියෙන තැන. වැටුනත් මුකුත් වෙන්නෑ. තව මේ.. ඕඩියෝ අවුට් එකකුත් තියෙනවා. අනික සිපර් එහෙමත් බලන්නකො. කිසි දෙයක් වෙන්නෙ නෑ. අපි වොරන්ටි එකකුත් දෙනවා".
"හ්ම්ම්.. මේක නම් හොඳයි හිතට ඇල්ලුවා. කීයද ඔයාල මේකට දෙන ප්‍රයිස් එක?"
"ෂර් මේ බෑග් එක රුපියල් පන්දාස් දෙසීයක් වෙනවා. ඒත් අපි අඩු කරලා ෂර්ට නිසා ආරදාස් හත්සීයට දෙන්නම්"
"අපෝ හොඳටම වැඩියි. තව අඩු කරන්න. ඔයාල මේවා පොඩි ගානකටනේ ගෙන්නන්නෙ. අපිට බොරුවට ඊට පස්සෙ ලොකු ගානක් කියනවා. තව අඩු කරන්න"
"අනේ නෑ ෂර්.. එහෙනම් ආරදාස් තුන්සීයක් දෙන්න. ලාස්ට් ප්‍රයිස්"
"පිස්සුද. හාරදාස් දෙසීයක් දෙන්න අපි සල්ලි ගස් වලින් කඩනවා කියල හිතුවද?. අපෝ තව අඩු කරන්න."
"එහෙනම් ෂර් තුන්දාස් නවසීයක් දෙන්න. ලාස්ට් ප්‍රයිස් ආයෙ නම් අඩු කරන්න බෑ."
"අපෝ වැඩියි වැඩියි. මම තව ගොඩක් අඩුවෙන් බලන්නෙ."
"එහෙනම් ෂර් අපි ගණන් අඩු එකක් බලමු. මේ තියෙන්නෙ. ආ මේකත් ගණන් අඩුයි."
"බෑ බෑ. මට මේ බෑග් එක තමා හිතට අල්ලලා ගියෙ. මේක දෙන්න මට තව අඩු කරලා."
"අයියෝ ෂර්.. ඉන්න එහෙනම් බොස් ගෙන් අහල බලන්න............
ෂර් තුන්දාස් පන්සීයක් දෙන්න. ලාස්ට් ප්‍රයිස්."
"බෑ බෑ. හොඳටම වැඩියි. මම යනවා. ඔය ගානට මට ඔයිට වඩා හොඳ එකක් ගන්න පුළුවන්.මම යනවා. තැන්ක් යූ. "
.
.
"ෂර් ෂර් පොඩ්ඩක් ඉන්නකො. ෂර් කීයකටද බලන්නෙ?"
"මට උපරිම එක්දාස් නවසීයක් දෙන්න පුළුවන්. මොකද කියන්නෙ දෙනවද?"
"අපෝ ෂර් ඳටම පාඩුයි නෙ. අපිට මේකෙන් ලොකු ගානක් හම්බෙන්නෑ ෂර්."
"ඒකනේ එහෙනම් ඉතිං වෙන කාට හරි විකුණ ගන්න. මම යනවා."
"ෂර් නිසා මේකට එහෙනම් තුන්දාහක් දෙන්න. වැඩේ කරමු". 
"බෑ  බෑ මගේ ගාන එක්දාස් නවසීයයි"
"අයියෝ ෂර් එහෙනම් දෙදාස් අටසීයක් දෙන්න. ලාස්ට් ප්‍රයිස්. ඒත් පාඩුයි අපිට. කමක් නෑ දෙදාස් අටසීයක් දෙන්න.
"නෑ මගේ ගානට දෙනවනම් දෙන්න. නැත්තං තියාගන්න."  
"අයියෝ ෂර් ඔච්චර ලෝබ වෙන්න එපා අප්පා. අපිත් බිස්නස් එකක් තමා කරනවා."

"ඒක තමා ඉතිං වෙන කෙනෙක්ට විකුණ ගන්න කියල මම මේ යන්නෙ"  
"හරි ඒනං දෙදාස් පන්සීයක් දෙන්න. ආයෙ නම් ෂත පහක් අඩු කරන්න බෑ" 
ඉතිං ඔච්චර අඩු කරන්නෙ ඔයාලා ඕවා ලාබෙට ගේන නිසානෙ. ඔන්න ඔහෙ දෙදාහක් ගන්න එහෙනම්.
අපිට හරිම පාඩුයි ෂර් ඒ ගානට දීලා. කිසිම ලාබයක් නෑ. හරි කමක් නෑ එහෙනම් දෙදාහක් දෙන්න.    
"හරි එහෙනං මට බෑග් එක දෙන්න. හැබැයි වොරන්ටි එක්ක. දෙදාහයි එහෙනම්"
"හරි ෂර්. ඉන්න බිල දාල දෙන්නම්"      

**********************************
මෙම සිද්දිය සිදුවීමට ප්‍රථම තවත් සිදුවීම් දෙකකි.

ඔහු ව්‍යාපාරික ස්ථානයකට ඇතුල් වුවේය. ව්‍යාපාරික ස්ථානයේ සේවය කරන්නාවූ තරුණියක් ඔහු අසලට පැමිණියාය.
"මොනවද බලන්නෙ?"
"මට බැක්පැක් එකක් ඕනෙ ට්‍රැවල් කරන්න, ඔෆිස් යන්න, සේරටම හරියන විදිහෙ එකක්"
"මේ තියෙන්නෙ. මේවා තමා අපි ළඟ තියෙන්නෙ." 
තරුණිය පාසැල් බෑග් කිහිපයක් සහ සයිඩ් බෑග් කිහිපයක් පෙන්වයි.
"මේවා ඇරෙන්න වෙන නැද්ද හොඳ බෑග්?" 
"නෑ අපි ළඟ ඔය ටික විතරයි තියෙන්නෙ."
හොඳ සයිඩ් බෑග් එකක් ඒ අතර තිබුණු නිසා ඔහු නිකමට මෙන් මිළ අසන්නට විය.
"කීයද මේ බෑග් එක?"
තරුණිය මිල සඳහන් කර ඇති ස්ටිකරය දෙස බලා "හාරදාස් එකසීයයි" කීවාය.
"අපෝ හොඳටම වැඩියිනෙ. අඩු කරලා දෙන්න"
"මේවා කම්පැනි ප්‍රයිස්. අඩු කරන්න බෑ."
"ආ ඒකත් එහෙමද? එහෙනං තියාගන්න"

ඔහු එතැනින් පිට වී තවත් කඩයකට පිවිසියේය.

ඇතුලේ පාරිභෝහිකයන් දෙතුන් දෙනෙකු සහ සේවකයන් දෙදෙනෙකු සිටිනු පෙනුනි. කිසිවෙක්වත් ඔහු ළඟට පැමිණ අවශ්‍ය මොනවාදැයි විමසුවේ නැත. ඔහු බෑග් තිබෙන තැන හොයාගෙන ගොස් පිරික්සන්නට විය. ඒ අතරද තිබුනේ පාසැල් බෑග් සහ ලොකු ට්‍රැවලින් බෑග් පමණි. එක සේවකයෙකු ඔහු අවට කැරකෙමින් සිටින බව ඔහුට දැනෙන්නට විය. නමුත් කිසිවක් නොවිමසයි. සමහරවිට ඔහු බෑග් එකක් සාක්කුවේ දමා ගනීවි යැයි සැක කරමින් එසේ ළඟට වී සිටින්නට ඇත. ඔහුගේ අවශ්‍යතාවයට සරිලන බෑගයක් සොයා ගැනීමට නොහැකි වූ තැන අසල සිටි සේවකයාගෙන් විමසීමක් කිරීමට තීරණය කර මෙසේ ඇසීය.
"බැක්පැක් නැද්ද ට්‍රැවල් කරන්නයි. ඔෆිස් ගෙනියන්නයි සේරටම හරියන විදිහෙ? ලැප් එකත් දාන් යන්න පුළුවන් වෙන්න ඕනෙ"
"තියෙනවා" කියූ සේවකයා පාසැල් බෑග් කිහිපයක් ඔහුට පෙන්වන්නට විය. ඒවා කිසිසේත් නොගැළපෙන නිසා ඔහු "වෙන බෑග් නැද්ද?" යැයි ඇසුවේය.
"නෑ. ඔය ටික විතරයි තියෙන්නෙ"

අවශ්‍යතාවයට සරිලන බෑගයක් සොයා ගැනීමට නොමැති නිසා ඔහු එම ව්‍යාපාරික ස්ථානයෙන් පිට වී ඉදිරියට ගමන් කරන විට මුස්ලිම් කඩයක් ඉදිරියේ සිටි තරුණයෙකු
"එන්න ෂර් ඇතුළට! මොනවද බෙලුවේ?"
යැයි විමසන්නට විය.

~~~නිමි~~~

Tuesday, June 2, 2015

කුලල් කාගත යුතුද සැමවිට?


මිහිඳු හිමි වැඩම කොට
මේ ලක් දෙරණ තලයට  
වසර දෙදහස් ගණනකුත්
ගතවිය අප නොදැනුවත්වම 

එතැන් සිට මේ රට තුළ  
බොදු පුනරුදයක්ම ඇති විය
රජු ප්‍රමුඛ ජාතියම 
බුදුන් සරණ යන්නට විය 

වසල ගති අඩු විය 
හොර හතුරන්ද නැති විය 
වෙනුවට එවැනි උන් සැම 
නිවුණු සිත් ඇත්තවුන් බිහි විය 

පසුව ලක් පොළොවට 
එක් විය සංක්‍රමණිකයන්ද ඉඳ හිට 
අළුත් ආගම් අළුත් භාෂා 
එක් විය ඒ අනුව හෙමි හෙමිහිට  

වත්මනේ අප රට තුළ   
එකතුවකි ආගම් කිහිපයක 
නමුදු උන් සැම සිත් තුළ 
නොමැත එකමුතු කමක් නම් දක්නට

බෙදී සැමදෙන ජාති ආගම් ලෙස 
ගැටුමකි දිනාගන්නට විවිධ දේ නිතරම 
ඉඳින් අපද හසුවී එම රැල්ලට
කුලල් කාගත යුතුද තේරුමක් නොමැතිව හිතවත? 

  


Wednesday, May 27, 2015

මචං අර ඇන්තනී සුරේන්ද්‍ර ගහපු භාණ්ඩෙ මොකද්ද?


මීට මාස කිහිපයකට කලින් මම පල කරපු සංගීත පෝස්ට් එකකට කටුසු හදවතේ කටුස්සා මෙන්න මෙහෙම කමෙන්ට් එකක් දාල තිබ්බා.

" මනා,මේක ටිකක් පෞද්ගලික ප්‍රශ්නයක්...ඔය ගිටාර් එකවගේම තියන යට හරිය රබානක් වගේ පෙනුමක් තියන වාදන භාන්ඩය මොකද්ද මචෝ?උඹට මතකනම් "ආදරනීය රෝහණ "ෂෝ එකේ ඇන්තනී සුරේන්ද්‍ර වාදනය කරපු එක.ඒකේ ලීඩ් ගිටාර් එකක් තිබුනේ නෑ.සුරේන්ද්‍ර ඒකෙන් තමා ලීඩ් පාර්ට් ප්ලේ කලේ.අහල තියන විදිහටනම් ඒක වාදනය කරන්න ඉස්සර හිටපු හොඳම වැඩ්ඩා සුරේන්ද්‍රගේ තාත්තා.පුළුවන්නම් ඒකගැන පොඩ්ඩක් කියල දියන් "

ඉතිං මම එදා ඒකට පොඩි පැහැදිලි කිරීමක් කරලා රිප්ලයි එකක් දාල කටුස්සට පොරොන්දු උනා ඉක්මණටම ඒ ගැන ලිපියක් දාන්නම් කියලා. එදායින් පස්සෙ ඕක මට හෙමීට අමතක වෙලා ගිහිල්ල දැන් දවස් දෙක තුනකට කලින් සංගීතෙ සම්බන්ධ පෝස්ට් එකක් දාන්න බැරි උනා නේද කියල කල්පනා කරද්දී තමා ආයෙමත් සැරයක් මතක් උනේ.

ඇත්තටම එදා අපේ කටුස්සා ඒ අහපු සංගීත භාණ්ඩයේ නම "බැන්ජො (Banjo)" කියල තමා හඳුන්වන්නෙ. බැන්ජො එක කියපු ගමන් මගේ මතකයට එන්නෙ ඇන්තනී සුරේන්ද්‍ර මහතායි. ඉතිං ඔයාලත් ඇන්තනී සුරේන්ද්‍ර කියන දක්ෂ වාදකයා අඳුරනවනම් ඔහු සිටින සංගීත වැඩසටහන් වල රබානක් වගේ එහෙක අමුතු රටාවක් දාපු ගිටාර් එකක් වගේ ලස්සන භාණ්ඩයක් වාදනය කරනවා දැකල ඇති. දැන් ඇන්තනී සුරේන්ද්‍ර දන්නෙ නැති අයට ප්‍රශ්නයක්නෙ. ඒ අයට දැන ගන්න මම ඇන්තනී සුරේන්ද්‍ර මහත්තයගේ පින්තුර කිහිපයක් දාන්නම්කො.

ඇන්තනී සුරේන්ද්‍ර මහතා

ඇන්තනී සුරේන්ද්‍ර මහතා
ඇන්තනී සුරේන්ද්‍ර මහතා
ලංකාවෙ බැන්ජො වාදකයින් විදිහට මම දැකල තියෙන්නෙ ඇන්තනී සුරේන්ද්‍ර සහ බුද්ධික පෙරේරා කියන දෙපළ විතරයි. ඔවුන් දෙදෙනා බැන්ජො සහ අනිකුත් තත් භාණ්ඩ(ගිටාර්,මැන්ඩලීන් ආදී) වාදනය කිරීමටද එක සේ දක්ෂය. 

බුද්ධික පෙරේරා මහතා
බුද්ධික පෙරේරා මහතා
නමුත් බැන්ජො කියන නම ඇහුණු ගමන් අපේ මතකයට එක පාරටම එන්නේ ඇන්තනී සුරේන්ද්‍ර කියන වාදකයායි. 

අද ලියන්නෙ ඒ අපූරු වාදකයා වාදනය කරපු අපූරු සංගීත භාණ්ඩය ගැන තොරතුරු ටිකක්. ඒ සංගීත භාණ්ඩයේ නම "බැන්ජො". සාමාන්‍යයෙන් අපි කියන්නෙ බැන්ජො එක කියලා. සමහර තත් වාදන භාණ්ඩ තියෙනවා ඒවා නිර්මාණය කරලා තියෙන්නෙ බෙර සම්බන්ධ කරගෙන. බෙර කියන්නෙ සාමාන්‍යයෙන් රබාන වගේ හැඩය තියෙන රබානෙ ප්‍රමාණයම වගේ බෙර. මේ බැන්ජො එකත් ඒ විදිහට හදපු භාණ්ඩ වලට තමා අයිති වෙන්නෙ. මුලින්ම මේ භාණ්ඩ නිර්මාණය වෙලා තියෙන්නෙ අප්‍රිකානු රටවල් මුල් කරගෙන. ඊට පස්සෙ තමා මැද පෙරදිග හරහා යුරෝපයට සංක්‍රමණය වෙලා මුළු ලෝකෙටම ව්‍යාප්ත වෙන්නෙ. ඇත්තටම මේ භාණ්ඩය නිර්මාණය කරලා තියෙන්නෙ අප්‍රිකානු වහල් ජනතාව කියල තමා  සඳහන් වෙන්නෙ. පස්සෙ ඒවා වහල් වෙළඳාම හරහා තමා අර කලින් කීව විදිහට ලෝකෙට ව්‍යාප්ත වෙන්නෙ. ඒ මුලින්ම හදපු භාණ්ඩය දැන් අපි දකින බැන්ජො එක වගේ දියුණු එකක් නෙමේ. ඒක ප්‍රථමික මට්ටමේ සංගීත භාණ්ඩයක් විදිහට තමා තිබිල තියෙන්නෙ. බැන්ජො කියන නම ලෝකෙට ප්‍රසිද්ධ වෙන්න කලින් මේ භාණ්ඩය "බැන්ජා","බැන්ජිල්","බැන්සා", "බැන්ෂෝ" වගේ නම්  වලින් තමා හඳුන්වල තියෙන්නෙ.

බැන්ජො එකට මුලින්ම තිබිලා තියෙන්නෙ මෙන්න මේ වගේ පෙනුමක්.

පැරණි බැන්ජො එකක්
පැරණි බැන්ජො එකක්

පස්සෙ එය ටිකෙන් ටික දියුණු වෙලා දැන් තියෙන තත්වයට පත් වෙලා තියෙනවා. දැන් දකින බැන්ජෝ එක හරි  ලස්සනයි වගේම හොඳ නිමාවකින් යුක්තයි.

වර්තමානයේ ඇති අලංකාර බැන්ජො එකක්
වර්තමානයේ ඇති අලංකාර බැන්ජො එකක්
බැන්ජො එක ප්‍රධාන වශයෙන් කොටස් කිහිපයකින් යුක්තයි. ඇත්තටම මෙම භාණ්ඩයේ හඬ නිපදවෙන්නෙ තත් කම්පනය කරලා උනත් බොක්ස් ගිටාර් එකේ වගේ සිදුරක් සහිත ලී පෙට්ටියක් නෙමේ තියෙන්නෙ. බැන්ජො එකේ ලී පෙට්ටිය වෙනුවට තියෙන්නෙ රබානක් වගේ තියෙන බෙර වර්ගයක්. ඒ රබාන පිටිපස්සෙන් තියෙනවා අනුනාදකයක්. ඒ වගේම මේ රබානට මුලින්ම යොදාගෙන තියෙන්නෙ සත්තුන්ගෙ හම්. නමුත් වර්තමානයේ නම් සත්ව හම් වෙනුවට කෘතිමව නිපදවනු ලබන හම් යොදාගනු ලබනවා. ඉතිං ඔය රබාන නිසා මේ භාණ්ඩයෙන් හරි ලස්සණ හඬක් ඇති වෙනවා. බොක්ස් ගිටාර් එකකින් එන හඬට වඩා ගොඩක් වෙනස්. ඔය හඬ නිසා තමා මේ බැන්ජො කියන වාදන භාණ්ඩය විශේෂ වෙන්නෙ සහ ලෝකය පුරා ජනප්‍රිය වෙන්න ඇත්තෙ.

ඒ වගේම සාමාන්‍යයෙන් බැන්ජො එකක තියෙන්නෙ තත් එහෙමත් නැත්නම් ස්ට්‍රින්ග්ස් හතරක්. නමුත් තත් පහ, හය , අට සහ දොළහ වශයෙන් තියෙන බැන්ජොත් තියෙනවා. ඒවා වාදකයාගේ අවශ්‍යතාව සහ කැමැත්ත අනුව තමා තෝරා ගැනීම සිදු කරන්නෙ. මෙම තත් සුසර කර ගන්නා ආකාර ඔය තත් ගාන අනුව එකිනෙකට වෙනස් වෙනවා. නමුත් ඒවා මම මේ ලිපියේ සඳහන් කරන්නෙ නැහැ. මේ භාණ්ඩයේ මූලික දේවල් පිළිබඳව විතරයි මේ ලිපියෙන් කතා කරන්නෙ.  

         
තත් හතරේ බැන්ජො එකක්
තත් හතරේ බැන්ජො එකක්

තත් පහේ බැන්ජො එකක්
තත් පහේ බැන්ජො එකක් 

තත් හයේ බැන්ජො එකක්
තත් හයේ බැන්ජො එකක්  

තත් අටේ බැන්ජො එකක්
තත් අටේ බැන්ජො එකක් 
තත් දොළහේ බැන්ජො එකක්
තත් දොළහේ බැන්ජො එකක්

මේ පහළින් තියෙන්නෙ බැන්ජො එකක තියෙන කොටස්. මේ රූපයේ තියෙන්නෙ තත් පහක් තියෙන බැන්ජො එකක්.

බැන්ජො එකක කොටස්
බැන්ජො එකක කොටස්
අද වන විට බැන්ජො එක ලෝකය පුරාවටම ජනප්‍රිය වෙච්ච සංගීත භාණ්ඩයක්. ගිටාරය වෙනුවට බැන්ජො එක යොදාගනිමින් ලෝකයේ විවිධ සංගීත කණ්ඩායම් පවා බිහිවී තිබෙනවා. ඒ වගේම බැන්ජො භාණ්ඩය මුල් කරගෙන සංගීත ශයිලීන් පවා බිහිවී තිබෙනවා.

බැන්ජො එකක හඬ මොනවගේද, වාදනය කරන්නෙ කොයි ආකාරයටද යන්න දැන ගන්නත් එක්ක මම වීඩියෝස් දෙකක් එකතු කරනවා. පළවෙනි එක නිරෝෂා විරාජිනී මහත්මිය ගායනා කරන පුන් සඳ රෑට කියන ගීතය. ඒකෙ අපි කාටත් හුරු බැන්ජෝ වාදනයක් තියෙනවා. මේ දාල තියෙන්නෙ දෙරණ ටීවී එකේ ගිය ඩෙල් ස්ටුඩියෝ වැඩ සටහනේ කරපු සජීවී පටිගත කිරීමක්. මේකෙ බැන්ජෝ එක වාදනය කරන්නෙ බුද්ධික පෙරේරා මහතා (අපේ විචාරක මහත්තයා තමා මට මේ වීඩියෝ එක ගැන මතක් කලේ. මට මේ සිංදුව අමතක වෙලා තිබුණේ :) ). ඒ වගේම දෙවෙනි එක බටහිර එකක්. පුළුවන් නම් මේ වීඩියෝස් දෙක නරඹන්න. බලන්නකො බැන්ජො ඒකෙන් කොච්චර හොඳට වැඩ දාන්න පුළුවන්ද, කොයි තරම් අපූරුද ඒ වාදන භාණ්ඩය කියලා.





මේ භාණ්ඩය ලංකාවේ ජනතාවට දැකලා පුරුදු උනත් බහුතරයක් දෙනා නිවැරදි නාමය දන්නෙ නැහැ. බොහෝ දෙනෙක් බැන්ජො එක මැන්ඩලීනය සමග පටළවාගෙන සිටිනවා. ඉතිං මේ ලිපිය මගින් මේ වාදන භාණ්ඩය සම්බන්ධව මූලික තොරතුරු කතා කරන්න තමා උවමනා උනේ. ඉතිං මේ කියපු තොරතුරු යම් තරමකට ප්‍රමාණවත් කියල මට හිතෙනවා. මේ වාදන භාණ්ඩය ලංකාවෙ වාදනය කරපු තවත් ප්‍රවීණ වාදකයො සහ වෙනත් තොරතුරු ඔයාල දන්නවානම් ඒවත් සඳහන් කරලා යන්න කියලා ඉල්ලා සිටිනවා. ඔන්න එහෙනං මං දැන් මේ ලිපිය ඉවර කරනවා.

ජය වේවා!!!

Saturday, May 23, 2015

සිංහල බ්ලොග් අවකාශයේ ඇනෝලා | Anonymous Users


ඔන්න අද කියන්න හදන්නෙ තරමක් වෙනස් දෙයක්. ඒත් බ්ලොග් අවකාශයේ සිටින මට වගේම ඔබටත් හොඳට හුරු පුරුදු දෙයක්. 

අපි බ්ලොග් පෝස්ට් එකක් කියවා එයට කමෙන්ට් කිරීම සාමාන්‍ය දෙයකි. සාමාන්‍යයෙන් කමෙන්ට් කිරීමට පෙර එතෙක් පලවී ඇති කමෙන්ට්ස් කියවීම බොහෝ දෙනාගේ සිරිතකි. එම කමෙන්ට් අතර අපි කවුරුත් දන්නා බ්ලොග් අයිතිකරුවන් සහ බ්ලොග් පවත්වාගෙන නොයන පුද්ගල නාමයන්ද දැකිය හැකිය. ඒ දෙපිරිසටම අයිති නැති පුද්ගලයන් ලෙස  ඇනෝලා(Anonymous) හැඳින්වීම නිවැරදි යැයි මට සිතේ. ඉතිං මෙම පෝස්ට් එකෙන් සිංහල බ්ලොග් ලෝකයේ ඇනෝවරු ගැන අපි කතා කරමු.

සාමාන්‍යයෙන් ඇනොනිමස්(Anonymous) ලෙස කැටගරි එකක් බ්ලොග් අවකාශයේ පවතින්නේ කිසියම් පුද්ගලයෙකුට ප්‍රොෆයිල් එකක් නොමැති වුවත් ඔහුගේ/ඇයගේ අදහස් ප්‍රකාශ කිරීමේ අයිතිය ලබාදීම සඳහාය. ඉතිං ඔබ බ්ලොග් පෝස්ට් කියවන විට ඕන තරම් ඇනොනිමස්(Anonymous) කමෙන්ට්ස් දැක ඇත. මෙලෙස සිංහල බ්ලොග් අවකාශයේ ප්‍රධාන වශයෙන් ඇනෝලා දෙපිරිසකි.

1) සැබෑවටම ඇනෝ
2) ප්‍රොෆයිල් ඇනෝ


සැබෑම ඇනෝලා ගැන කතා කරන විටදී ඔවුන්ද උප කොටස් වලට බෙදිය හැකිය. එනම් සැබෑ ආතල් ඇනෝ සහ  සැබෑ ආතල් නොවන ඇනෝ.

මෙයින් මා කැමති පිරිස සැබෑ ආතල් ඇනෝලා වේ. හේතුව ඔවුන් බ්ලොග් පෝස්ට් එකට අදාල සෑම  කමෙන්ට් එකකටම ගැළපෙන ලෙස ආතල් එකක් දෙන නිසාය. ඔවුන් ගැන වැඩි දෙනෙක් දන්නවා නොඅනුමානයි. උදාහරණයක්‌ ලෙස පාන් ඇනෝ සහ අයිසෙ ඇනෝ ගෙනහැර දක්වන්න පුළුවන්. තවත් එවැනී අනෝලා ගොඩක් සිටියත් මට මතකෙට ආවේ එපමණකි. මෙම අනෝලාගේ වැඩි ක්‍රියාකාරිත්වයක් අපගේ ප්‍රසිද්ධ බ්ලොග් කරුවන්ගේ පෝස්ට් වලින් සෑම කෙනෙක්ටම බලා ගන්න පුළුවන්. මාතලන්, රසිකලොජි, රාජ්ගෙ නවාතැන ඒ අතරින් කිහිපයකි.


මට මෙම පෝස්ටුව ලිවීමට සිතුනේද මාතලන් බ්ලොග් අඩවියේ පලවූ වාසු සම්බන්ධ පෝස්ටුවට අදාළ කමෙන්ට් කියවීමෙන් පසුවයි. මාගේ එක් විනෝදාංශයක් ලෙස දැන් එම කමෙන්ට් කියවිල්ල පත් වී ඇත්තේ එම කමෙන්ට් වල ඇති හාස්‍යමය ස්වරුපයෙන් යුත් ගැඹුරු අදහස් නිසාය. නමුත් ඇතැම් විට මෙම ආතල් ඇනෝ කමෙන්ට්ස් වල කුනුහබ්බද නැතුවාම නොවේ.  එමෙන්ම සමහර බ්ලොග් කරුවන්ට කෝචෝක් කිරීමද දැක ඇත. කෙසේ නමුත් ඔවුන් නිසා බ්ලොග් ලියන කියවන බහුතරයක් බඩ පැලෙන්න හිනා වෙනවාට කිසිම සැකයක් නැත.  

එහි අනෙක් උප කොටස වන්නේ සැබෑ ආතල් නොවන ඇනෝවරුන්ය. ඇත්තටම ඔවුන්ට අවශ්‍ය වන්නේ අදාළ පොස්ටුව මගින් කියන කරුණු වලට තව දෙයක් එක් කිරීම, පෝස්ටුවේ හොඳ කීම හෝ අඩු පාඩු පෙන්වා දීම වේ. ඇතැම් විටෙක නිර්දය ලෙස විවේචනය කිරීම්ද මා දැක ඇත. ඔවුන් බොහෝ විට ඒ ඒ ක්ෂේත්‍ර වල  ප්‍රවීණයෝ විය හැකියැයි මට සිතේ. කෙසේ වෙතත් ඔවුන්ද නාමික ප්‍රොෆයිල් වලින් ඇවිත් කමෙන්ට් දමනා අය සමග එක මට්ටමක තැබීමට මා කැමැත්තෙමි. 


දැන් කියන්නට යන්නේ ටිකක් බැරෑරුම් කරුණක් කීවොත් නිවැරදියි. එනම් ප්‍රොෆයිල් ඇනෝවරු ගැනය. මේ කට්ටිය ටිකක් භයානක පිරිසක් කීවොත් හරි. ප්‍රොෆයිල් ඇනෝවරු ලෙස හැඳින් වෙන්නේ සැබෑ නමිනුත් ප්‍රොෆයිල් එකක් තිබෙන නමුත් ඇනෝ ලෙස කමෙන්ට් කරනා පිරිසටයි. බොහෝ විට තමන් අකැමැති පුද්ගලයන් සමග වාද කිරීමට, බැන ගැනීමට සහ මඩ ගැසීමට මෙම ප්‍රොෆයිල් ඇනෝලා ක්‍රියා කරනා බව සමහර ඇනෝ කමෙන්ට්ස් කියවීමෙන් නිගමනය කිරීමට පුළුවන්. නමුත් ඔවුන් අර සැබෑවටම ඇනෝලා සමග එක මට්ටමක තබන්න මම අකමැත්තෙමි.


කෙසේ නමුත් බොහෝ බ්ලොග් කරුවන්හට ඇනෝලාගෙන් ලැබෙන සේවය අතිමහත්ය. එසේ කියන්නේ ඇනෝවරු දිනපතා පැමිණෙන ප්‍රධාන බ්ලොග් අඩවි කිහිපයක් ඇත. එම අඩවි පවත්වන් යන පුද්ගලයන් හට වෙනත් කවුරුන් හෝ වැරදි ලෙස විවේචනය කිරීම්, බැන වැදීම් වලදී මෙලෙස බ්ලොග් වලට පුරුදු වුනු ඇනෝවරු එම කමෙන්ට් කරන තැනැත්තාව නැති බන්ගස්තාන කිරීමට එකාවන්ව පෙළ ගැසී තම තමන්ගේ අදහස් දැක්වීම් වලින් බ්ලොග් අයිතිකරුවා වෙනුවෙන් පෙනී සිටින අවස්ථා මම දැක ඇත්තෙමි. නමුත් අනෙක් ලක්ෂණය නම් ඔවුන් බ්ලොග් අඩවිය ලියන තැනැත්තාට විවිධ ආකාරයේ කෝචෝක් කරමින්, නමුත් දිගටම එම අඩවියත් සමග රැඳී සිටමය. මෙහෙම කියද්දී ප්‍රසිද්ධ බ්ලොග් නාමයන් කිහිපයක් ඔබට මතක් වෙනු ඇති.


එමෙන්ම මෙම ඇනෝවරුන් නිසා බ්ලොග් අඩවියකට සැලකියයුතු ට්‍රැෆික් එකක් ලැබෙන බව නොරහසකි. නමුත් මෙම ඇනෝවරු සමග ගනුදෙනු කිරීමට අකමැති පිරිසක්ද මෙම අවකාශයේ සිටිති. එවන් පුද්ගලයින් ඇතැම් විට ඇනෝවරුන්ට කමෙන්ට් කිරීමට නොහැකි ලෙස බ්ලොග් අඩවියේ සැකසුම් වෙනස් කර ඇත. සමහරු සෑම කමෙන්ට් එකක්ම පලකිරීමට ප්‍රථම කියවා බලා පසුව පබ්ලිෂ් කිරීමට හැකි වන ලෙස සැකසුම් සකස් කොට ඇත. ඇත්තටම එය මාධ්‍ය නිදහසට බාධාවක් නොවන්නේද?. මේ ලියන මටද ඇනෝවරු කිහිප දෙනෙක්ම කමෙන්ට් කර ඇති අතර එක්කෙනෙක් දෙන්නෙක් හොඳ පද වලින් අමතා ඇති බවද මේ අවස්ථාවේදී මාගේ මතකයට නැගෙයි :D. නමුත් ඔවුන් සැබෑ ඇනෝවරුද ප්‍රොෆයිල් ඇනෝවරුද යන්න අදටත් ප්‍රශ්නයකි.

ප.ලි:
ඇනෝවරුන්ටද අදහස් ප්‍රකාශ කිරීමට ඉඩ ලබාදීම කලයුතුයි. එමගින් අපට අළුත් දේවල් ඉගෙන ගැනීමට යොමුවීම්, වැරදි හදා ගැනීම් සහ හොඳ හැටි ලේ පිරිසිදු කරගැනීමට අවස්ථාවන් උදාවේ.

ජය වේවා!!!   

Tuesday, May 19, 2015

රොකට් එකේ ගියපු සිරිපාල


අපේ රටේ හැම තැනකම -  හැම කෙනෙක්ම දන්න දෙයකි
ගංජා ගැන පුවතකි මේ - කියන්න යන්නේ

හිටියා එක මනුස්සයෙක් - කොළඹට ළඟ හොඳ නගරෙක
සිරිපාලයා නමින් තමයි - ඔහු හැඳින්නුවේ

පුළුවන් හැම වෙලාවකම - ගංජා සුරුට්ටුව ඇදීම
සිරිපාලගේ තිබුන - ලොකුම රාජකාරියයි

මේ අතරේ ලෝකෙ අපේ - වෙන්න යන්නෙ පුදුම දෙයකි
නාසා එකෙන් රොකට් එකක් - යවන්න යන්නේ

ලෝකෙ ඉන්න මිනිසුන්ගෙන් - තුන් දෙනෙක්ම තෝරාලා
රොකට් එකේ දැමීමටයි - තීරණය උනේ

තුන්දෙනගෙන් එක මිනිහෙක් - ලංකාවෙනි තෝරගත්තෙ
වෙන කවුරුත් නෙමේ අනේ - සිරිපාල තමයි

අනිත් දෙන්න වෙන රට වල - නම ගිය වැඩකරුවන් වෙති
පොත් කියවන්නෙක් - සමගින් ආචරතුමෙකුයි

මේ අතරේ සිරිපාලයා - ඇමරිකාවෙ එක්ක ගියා
අහසෙ ඉන්න තිබ්බ කාලෙ - මාස හතරකුයි

තමන්ට උවමනා ඒව - නාසා එකෙන් ඇසූ නිසා
අර දෙන්නා පොත් - විජ්ජා බඩු බුක් කෙරුවේ

සිරිපාලයා උඩට ගිහිං - මාස ටිකක් ඉන්න නිසා
ඇති පදමට ගංජා මිටි - ඉල්ලා සිටියේ

ඔක්කොම බඩු පැක් කරලා - රොකට් එකත් උඩට යවා
මේ තුන්දෙන කරනා වැඩ - නාසා එකෙන් පොළොවෙ ඉඳන් බලාන උන්නේ

එකෙක් හොඳට පොත් කියවයි - අනෙකා විජ්ජා පෙන්නයි
සිරිපාලයා මොනවාදෝ - හොයනව පෙනුනේ

හොයල හොයල හති වැටිලා - ඔළුව කස කසා ටිකකින්
ඇඳට වැටී ඔහේ බලන් - ඉන්නට වුයේ

මෙලෙස මාස හතර පුරා - සිදුවුයේ එකම දෙයකි
හති දමමින් හොයන එකයි - පාලයා කෙරුවේ

මාස හතර ඉවර වෙලා - රොකට් එකත් බිමට ඇවිත්
තුන් දෙනාම යහතින් - හෙමිහිට බැහැගත්තේ

මේ කාලය පුරාවටම තමන් ලබා ගත්ත ඒවා - නාසා එකෙන් විමසු විට
තුන් දෙනාම මෙන්න මෙහෙම - පිළිතුරු දෙන්නේ

මම නම් හොඳ හැටි කියවා - සෑහෙන පමණට දැනුමක්
මේ කාලය පුරාවටම - රැස් කර ගත්තා

කරපු පරික්ෂණ ඔක්කොම - මම හොඳටම කරගත්තා
නවතම දේවල් රැසක්ම - මම දැන ගත්තා

අන්තිමේට සිරිපාලයා - මූණ නොරොක් කර හොඳ හැටි
මෙන්න මෙහෙම නාසා එකෙන් - අහන්න වූයේ






"කොහෙද අයිසෙ ගිණිපෙට්ටිය - හංගල තිබ්බේ!!!"  



මදාවි ඉට්ටැයිල් එක කොපි කරලා මටත් කවි ටිකක් ලියන්න හිතුනා ;).
ජය වේවා!!!