තුති පිදුම සහ ඉදිරි දැක්ම.

සුභ දවසක් ඔයාල සියලු දෙනාටම. මම අද මේ ලියන ලිපිය බොහොම කෙටි එකක්. නමුත් මම මෙය පළ කල යුතුයි කියල හිතනවා. මොකද එහෙම  නොකලොත් මානාගෙ හිතට හරි නැති නිසා. අද මට ගොඩක් සතුටුයි වෙන මොකකටවත් නෙවෙයි. මනාගෙ පින්තාරුව ගැන අගය කරල වෙනත් හොඳ බ්ලොග් එකක වෙනමම ලිපියක් පල කරලා තිබුනා. ආධුනික බ්ලොග් කරුවෙක්ගෙ බ්ලොග් එකක් සම්බන්ධව තවත් හොඳ බ්ලොග් එකක් මගින් වෙනම ලිපියක් පලකරනවා කියල කියන්නෙ ඒ බ්ලොග් එක ලියන කෙනාට ගොඩක් ලොකු ශක්තියක්, දහිරියක් වගේම ගොඩක් වටිනා දෙයක්. මේ පොස්ට් එක පළ කරලා තිබුනෙ දම්පාට දේදුන්න බ්ලොග් අඩවියේ. ජීවන ෆනාන්දු මහතා තමයි මෙම බ්ලොග් අඩවිය ලියන්නේ. මෙම ලිපිය මනාට තවත් විශේෂ එකක් වෙන්නෙ  දම්පාට දේදුන්න බ්ලොග් අඩවියේ පනස් වන ලිපිය ලෙස පල වී තිබීමයි. ඉතින් මනාට මෙම ලිපිය දැක්කම නිහතමානී ආඩම්බරයක් ඇති වුණා. මතක විදිහට පාසලේ පොඩි පන්තිවල ඉඳිද්දී හොඳක් ඇහුවට පස්සෙ තමන් කරපු දෙයක් ගැන ප්‍රසිද්ධියේ හොඳක් අහුවමද කොහෙද. ඉතින්  ජීවන ෆනාන්දු මහතාණෙනි ඔබට ගොඩක් ස්තුතියි මානාගෙ පින්තාරුව ගැන බ්ලොග් කියවන අය දැනුවත් කරන්න ලිපියක් පළ කරපු එකට. ඒ වගේම මානාගෙ පින්තාරුව ගොඩ දෙනෙක් දැනගත්තේ මාතලන්ගෙ සින්ඩිය සහ අජිත් කුමාරගේ බ්ලොග් දර්ශකය හරහායි. ඉතින් එම දෙපොලටත් බොහොමත්ම ස්තුති වන්ත වෙනවා. 

අවසාන වශයෙන් මනා එක දෙයක් කියන්න කැමතියි. මේ බ්ලොග් එකේ පටන් ගත්ත දේවල් කිසිම විදිහකින් මගින් නවත්වන්නෙ නම් නෑ. අනිවාර්යයෙන්ම ඔයාලට නිවැරදිව සහ සරළව දන්නා සියළු දේ දිගටම ලියනවා කියන එක මනා කියන්න කැමතියි. විශේෂයෙන්ම මම ඔයාලට ගෙනෙන සංගීතය සම්බන්ධ කරුණු වෙනත් සංගීතය උගන්වනවා යයි කියා ගන්නා අය (සංගීතය උගන්වන ඉතාමත්ම දක්ෂ සහ මනුෂ්‍යත්වය ඇති ගුරුවර හෝ ගුරුවරියන් නොවේ) ඉතා සුළු කරුණු කිහිපයක් මාස ගණනක් අතපත ගාමින්, තම ශිෂ්‍ය ශිෂ්‍යාවන්ගෙන් අසාධාරණ ලෙස මුදල් අය කරගනිමින් තම මඩිය තර කර ගනිමින් සිටින බව සමහර විට ඔබ නොදන්නවා ඇති. ඔවුන්ගෙන් බිහි වෙන ගෝලයන් සංගීතය පිළිබඳව නිසි අවබෝධයක් නොමැතිව අයාලේ යමින් සිටියි.  මෙම තත්වය කාලයක් හොඳින් නිරීක්ෂණය කල මනාට සංගීතය සම්බන්ධව දන්නා කරුණු පුළුවන් විදිහට අනිත් අයට කියල දෙන්න ඕනේ කියල හිතල තමා මනාගේ පින්තාරුව කියල මෙහෙම බ්ලොග් එකක් පටන් ගන්න හිතුනෙ. මනාගෙ ප්‍රධානම අරමුණ සියලු දෙනාටම නොමිලේ සංගීතය පිළිබඳව දන්නා නිවැරදි දැනුම, සරලව කියා දීමයි.

විශේෂයෙන්ම ඔබ සංගීතය ඉගෙන ගැනීමට ගුරුවරයෙකු තෝරාගන්නේ නම් ඔහුගේ නම සහ සිටින ශිෂ්‍ය ප්‍රමාණය බලා රැල්ලට යන්නාක් මෙන් ඔහු වෙත යන්න එපා.  ඔහුගේ හැකියාව, බිහිවූ ගෝලයන්ගේ දක්ෂතාවයන් සහ විශේෂයෙන්ම ගුරුවරයාගේ මානුෂීය ගතිය ( මනුස්සකම)  සලකා බලා සංගීතය ඉගෙන ගැනීමට ගුරුවරයෙකු තෝරාගැනීම සිදු  යුතු බව මනාගේ හැඟීමයි. එම කරුණු සලකා බලා ඔබ ගුරුවරයෙකු තෝරා ගැනීමේදී ඔබට සමහරවිට ප්‍රසිද්ධ  නැති, හොඳ පහසුකම් නැති නමුත් හොඳ මනුෂ්‍ය ගුණ ඇති සරළ ගුරුවරයෙකු හමුවේවි. එවන් ගුරුවරයෙකු කරා යාමට නොහැකි සහ වෙලාවක් නොමැති බොහෝ දෙනෙකුට මෙම බ්ලොග් අඩවියත් උපකාරී වේවි. 

මනා ඉදිරියේදීත් සංගීතය සම්බන්ධ ලිපි එලෙසටම ගෙන එනවා. නමුත් එවන් ලිපියක් පළ කිරීම අඩුම තරමින් දවස් හතකට සැරයක් වගේ සිදු කිරීම හොඳයි කියල මනාට හිතෙනවා. මොකද එක ලිපියක කරුණු අවබෝධ කරගෙන පොඩි හෝ අභ්‍යාසයක් සිදු කිරීමට අවම තරමින් එම කාලය උවමනා වෙනවා. එසේ සිදු නොවුනොත් එම ලිපි නිකන්ම කරුණු ටිකක් ඇතුලත් වුනු ලිපි පෙළක් බවට පත් වේවි. ඉතින් ඉදිරියටත් මනාගෙ පින්තාරුව සමග රැඳී සිටින්න කියල ඔයාලගෙන් ආදරයෙන් ඉල්ලා සිටිනවා. හැම දෙනාටම ජය වේවා!!!